Iqtisodiy tadqiqotlar va islohotlar markazi (ITIM) fevral oyida O‘zbekistonda ko‘chmas mulk va avtomobil bozorida talab qanday o‘zgarganini tahlil qildi. “Gazeta.uz” tadqiqot natijalarini e’lon qildi.
Yanvar va fevral oyida ushbu bozorlarda talabning oshishi, markaz ma’lumotlariga ko‘ra, O‘zbekistonda iqtisodiy faollikning tiklanganidan dalolat bermoqda.
Ko‘chmas mulk bozori
Koronavirus pandemiyasi davrida karantin cheklovlarining o‘rnatilishi natijasida iqtisodiy faollik keskin tushib ketgan edi. Xususan, aprel oyidagi lokdaun ko‘chmas mulk oldi-sotdisining 2019-yil mos davriga nisbatan 87,1 foizga (Toshkent shahrida 94,2 foizga va Toshkent viloyatida 89,8 foizga) kamayishiga olib keldi.
2021-yil fevralida ko‘chmas mulk oldi-sotdisi bo‘yicha tuzilgan shartnomalar soni yanvar oyi bilan taqqoslaganda 11,5 foizga (2020-yil fevral oyiga nisbatan 19,7 foizga) ko‘paydi. Ko‘chmas mulk bozorining 30 foizdan ko‘prog‘i to‘g‘ri keluvchi Toshkent shahrida ushbu ko‘rsatkich 10,8 foizni (2020-yil fevral oyiga nisbatan 23,7 foizni) tashkil qildi.
Avtomobil bozori
Odatda O‘zbekiston bo‘ylab birlamchi va ikkilamchi bozorlarda avtomobil savdosining oylik o‘sishi o‘rtacha 2−3 foizni tashkil etadi. 2020-yilning mart oyi o‘rtalaridan qat’iy karantin tadbirlarini joriy etilishi natijasida mart oyida ro‘yxatga olingan va qayta ro‘yxatga olingan avtomobillar soni 2019-yilning shu davriga nisbatan 17,3 foizga (o‘tgan fevral oyiga nisbatan 34,6 foizga), aprel oyida esa 73,8 foizga (63,1 foizga) kamaydi.
2020-yilning may oyidan boshlab avtomobil bozoridagi vaziyat yana tiklana boshladi. Xususan, iyun oyida avtomobillar savdosi 2019-yil mos davri bilan taqqoslaganda 14,8 foizga (o‘tgan oyga nisbatan 15,7 foizga) oshdi. Avgust oyida ushbu ko‘rsatkich 3,8 foizni (o‘tgan oyga nisbatan 54,3 foizni) tashkil etgan.
Avtomobil bozorida talab sentabr—oktabr oylarida ham o‘sishda davom etdi. Savdo hajmi 2019-yil mos davri bilan taqqoslaganda sentabr oyida 29,5 foizga, oktabr oyida 19,2 foizga, noyabr oyida 9 foizga va dekabr oyida 10 foizga o‘sdi.
2021-yilning ferval oyida avtomobil bozorida aholi talabi yanvar oyiga nisbatan 3 foizga oshdi. Lekin 2020-yil fevral oyi bilan taqqoslaganda ushbu ko‘rsatkich 10,4 foizga kamaydi. Iqtisodiy tadqiqotlar va islohotlar markazi buni Asaka avtomobil zavodi 2021-yil yanvar—fevral oylarida modernizatsiya ishlarini amalga oshirish uchun ishlab chiqarishni vaqtincha to‘xtatganligi bilan izohlagan.
Avvalroq Iqtisodiy tadqiqotlar va islohotlar markazi ikkilamchi avtomobil bozori va avtomobillar narxlarining shakllanishiga ta’sir etuvchi omillarni o‘rganib chiqqan edi.
Izoh (0)