O‘zbekistonda javobgarlikni og‘irlashtiradigan holatlarda qasddan odam o‘ldirganlik uchun javobgarlikka tortish yoshini 14 yosh etib belgilash taklif qilinmoqda (hozirda 13 yosh). Bu haqda Prezidentning “Xotin-qizlar va bolalar huquqlarining kafolatlarini ta’minlash, qonuniy manfaatlarini himoya qilishning qo‘shimcha chora-tadbirlari to‘g‘risida”gi qarori loyihasida nazarda tutilgan.
Bosh prokuratura IIV, Adliya vazirligi va Inson huquqlari bo‘yicha Milliy markaz bilan birgalikda uch oy muddatda Jinoyat va Jinoyat-protsessual kodekslariga tegishli o‘zgartirishlar kiritadi.
UzNews’ning yozishicha, Bosh prokuratura ushbu qoida jinoyat qonunchiligida voyaga yetmaganlarga nisbatan insonparvarlikni kuchaytirish maqsadida kiritilayotganini ta’kidlamoqda. Qayd etilishicha, aksariyat xorijiy mamlakatlar Jinoyat kodekslarida (Germaniya, Fransiya va MDHning barcha mamlakatlarida) javobgarlik yoshi 14 yosh sifatida belgilangan.
Shuningdek, jinoyat qonunchiligini yanada liberallashtirish, xotin-qizlar va bolalarni himoya qilishga qaratilgan qo‘shimcha kafolatlarni ta’minlash maqsadida 18 yoshga to‘lgunga qadar sodir etgan jinoyati uchun voyaga yetmagan shaxsni u jazoni o‘tab bo‘lganidan so‘ng sudlanmagan deb hisoblash taklif etilmoqda. Ushbu qoida voyaga yetmaganlar manfaati hamda ularning voyaga yetmaganlik davridagi jinoyatlari uchun kelgusi hayotlarini yangidan boshlashga imkoniyat berish maqsadida kiritilmoqda.
Voyaga yetmagan jabrlanuvchi yoki guvohni so‘roq qilishning umumiy davomiyligi kun davomida, dam olish va ovqatlanish uchun bir soatlik tanaffusni hisobga olmaganda, to‘rt soatdan oshmasligi lozimligi taklif etilmoqda (hozirda olti soatni tashkil qiladi). Mazkur qoida bolaning yoshi va psixologik holatini inobatga olib kiritilmoqda.
Ushbu qaror loyihasi muhokamasi 3-aprelgacha davom etadi.
Izoh (0)