Ўзбекистонда жавобгарликни оғирлаштирадиган ҳолатларда қасддан одам ўлдирганлик учун жавобгарликка тортиш ёшини 14 ёш этиб белгилаш таклиф қилинмоқда (ҳозирда 13 ёш). Бу ҳақда Президентнинг «Хотин-қизлар ва болалар ҳуқуқларининг кафолатларини таъминлаш, қонуний манфаатларини ҳимоя қилишнинг қўшимча чора-тадбирлари тўғрисида»ги қарори лойиҳасида назарда тутилган.
Бош прокуратура ИИВ, Адлия вазирлиги ва Инсон ҳуқуқлари бўйича Миллий марказ билан биргаликда уч ой муддатда Жиноят ва Жиноят-процессуал кодексларига тегишли ўзгартиришлар киритади.
UzNews’нинг ёзишича, Бош прокуратура ушбу қоида жиноят қонунчилигида вояга етмаганларга нисбатан инсонпарварликни кучайтириш мақсадида киритилаётганини таъкидламоқда. Қайд этилишича, аксарият хорижий мамлакатлар Жиноят кодексларида (Германия, Франция ва МДҲнинг барча мамлакатларида) жавобгарлик ёши 14 ёш сифатида белгиланган.
Шунингдек, жиноят қонунчилигини янада либераллаштириш, хотин-қизлар ва болаларни ҳимоя қилишга қаратилган қўшимча кафолатларни таъминлаш мақсадида 18 ёшга тўлгунга қадар содир этган жинояти учун вояга етмаган шахсни у жазони ўтаб бўлганидан сўнг судланмаган деб ҳисоблаш таклиф этилмоқда. Ушбу қоида вояга етмаганлар манфаати ҳамда уларнинг вояга етмаганлик давридаги жиноятлари учун келгуси ҳаётларини янгидан бошлашга имконият бериш мақсадида киритилмоқда.
Вояга етмаган жабрланувчи ёки гувоҳни сўроқ қилишнинг умумий давомийлиги кун давомида, дам олиш ва овқатланиш учун бир соатлик танаффусни ҳисобга олмаганда, тўрт соатдан ошмаслиги лозимлиги таклиф этилмоқда (ҳозирда олти соатни ташкил қилади). Мазкур қоида боланинг ёши ва психологик ҳолатини инобатга олиб киритилмоқда.
Ушбу қарор лойиҳаси муҳокамаси 3 апрелгача давом этади.
Изоҳ (0)