Namangan viloyatining Chust tumani “Yorqishloq” mahallasida Navro‘z bayrami kunlari ommaviy tuxum urishtirish musobaqalari bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Mazkur o‘yin qariyb bir asrdan beri avloddan avlodga o‘tib keladi. Uni yakka tartibda ham, jamoa bo‘lib ham o‘ynash mumkin.
“Tuxumlar jangi”dan avval ularga qizil, ko‘k yoki boshqa rang berib, bayramona bezash mumkin. Ular darrov sinib qolmasligi usullarini esa har kim o‘zicha talqin qiladi: kimdir tuzli suvda obdon qaynatish zarur desa, yana kimdir xonaki tuxumlardan foydalanishni ma’qul deb biladi.
Qatnashuvchilarning aytishicha, bu o‘yin qaysidir ma’noda daromad manbai ham. Chunki pishirilgan tuxum bozorda ha deganda xaridor e’tiboriga tushmasligi mumkin. Musobaqa bahonasida esa darrov sotilib ketadi.
O‘yinda yutqizgan tomon tuxumlar pulini to‘lab beradi. Bu yil bir dona pishirilgan tuxum bahosi 1,5-2 ming so‘mga teng bo‘ldi.
Yorqishloqda o‘tkazilgan navbatdagi “tuxumlar jangi”da ishtirok etish va tomosha qilish uchun Chust tumanining barcha mahallalaridan mehmonlar keldi. Ularning soni 1000 nafarga yaqin bo‘lgani aytilmoqda.
Izoh (0)