Davlat xavfsizlik xizmati tomonidan Toshkent shahri, Farg‘ona va Namangan viloyatlarida o‘tkazilgan tadbirlar natijasida giyohvand moddalar savdosi bilan bog‘liq bir necha holatga chek qo‘yildi. Bu haqda “Daryo”ga DXX matbuot xizmati xabar berdi.
Xususan, DXX Qashqadaryo viloyati boshqarmasi hamda Toshkent shahar bojxona boshqarmasi hamkorligida o‘tkazilgan tezkor tadbirda Toshkentning Chilonzor tumani hududida Denov —Toshkent yo‘nalishida kirakashlik bilan shug‘ullanuvchi fuqaro boshqaruvidagi avtomashina to‘xtatilgan. Avtomashina xolislar ishtirokida ko‘zdan kechirilganda, uning yukxonasida Denov shahridan pochta sifatida berib yuborilgan avtomobil ehtiyot qismi ichiga yashirilgan 965 gramm opiy giyohvand moddasi borligi ma’lum bo‘lgan va protsessual tarzda rasmiylashtirib olingan.
Aniqlanishicha, mazkur giyohvandlik vositasining egasi Chilonzor tumanida yashovchi fuqaro M.N. bo‘lib, uni denovlik A.U. 6 500 dollarga sotib olgan. Tezkor tadbir doirasida har ikki shaxs hibsga olindi. Ushbu fuqarolar muqaddam giyohvand moddalar savdosi bilan bog‘liq jinoyat sodir etganliklari uchun jinoiy javobgarlikka tortilgan bo‘lsa-da, lekin xatolaridan to‘g‘ri xulosa chiqarmagan.
DXX Farg‘ona viloyati boshqarmasi xodimlari tomonidan o‘tkazilgan tezkor tadbirda giyohvand moddalar savdosi bilan shug‘ullanib kelgan bir guruh shaxs jinoyat ustida qo‘lga olindi.
Farg‘ona tumanida istiqomat qiluvchi ushbu fuqarolardan kelgusida sotish maqsadida yashirib qo‘yilgan 3 kilogramm 14 gramm gashish giyohvand moddasi ashyoviy dalil sifatida olingan. Aniqlanishicha, Qirg‘izistonning Botken viloyati Qadamjoy tumanida yashovchi shaxsdan 15 ming dollariga sotib olingan ushbu giyohvandlik vositasi kontrabanda yo‘li bilan O‘zbekistonga olib kelingan.
DXX Namangan viloyati boshqarmasi hamda viloyat bojxona boshqarmasi xodimlari tomonidan o‘tkazilgan tezkor tadbirda esa Namangan shahrida harakatlanayotgan Cobalt to‘xtatilib tekshirilganda, yo‘lovchi sifatida ketayotgan Uchqo‘rg‘on shahrida yashovchi, muqaddam sudlangan A.A.ga tegishli sport sumkasida 787 gramm gashish moddasi borligi aniqlangan.
Tergovga qadar tekshiruv davomida A.A. Qirg‘izistondan kontrabanda yo‘li bilan olib o‘tilgan ushbu giyohvand moddani Namangan shahrida istiqomat qiluvchi, muqaddam sudlangan M.M.ga berishi kerakligi aniqlangan va tezkor tadbir davom ettirilib, mazkur shaxs ham qo‘lga olingan.
Pop tumanida joylashgan “Namangan” YPX maskanida Namangan—Toshkent yo‘nalishida harakatlanayotgan Nexia to‘xtatilib tekshirilganda, unda yo‘lovchi sifatida ketayotgan Uchqo‘rg‘on tumanida yashovchi Qirg‘iziston fuqarosi X.A.ning yonida 392 gramm gashish moddasi borligi aniqlanib, tegishli tartibda rasmiylashtirib olingan. Fuqaro uni sotish maqsadida Toshkent shahriga olib ketayotgan bo‘lgan.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, ularning jinoiy sheriklarini aniqlash bo‘yicha ham chora-tadbirlar amalga oshirilmoqda.
Izoh (0)