Qashqadaryo viloyatining Chiroqchi tumanida joylashgan maktablarning birida ziyofat uyushtirgan direktor va uning o‘rinbosarlari ishdan ketdi, deb xabar beradi tuman Xalq ta’limi bo‘limi.
Ma’lum qilinishicha, 19-mart kuni Chiroqchi tumani xalq ta’limi bo‘limiga qarashli umumta’lim maktabi direktori P.A. boshchiligida maktab jamoasi Navro‘z bayramini nishonlash maqsadida jamoa roziligi bilan 50 ming so‘mdan pul yig‘gan. Jamoat bayramni o‘zlari faoliyat olib borayotgan ta’lim muassasasida uyushtirishga qaror qilgan.
Navro‘z bayrami munosabati bilan maktab foyesida tashkil etilgan ziyofat dasturxonida spirtli ichimliklar ham bo‘lgani aytilmoqda.
Xalq ta’limi bo‘limi mudiri boshchiligidagi ishchi guruh a’zolari 20-mart kuni maktabda bo‘lgan holatga oydinlik kiritish maqsadida maktabga borgan. Ta’kidlanishicha, direktor va uning o‘rinbosarlari qilgan ishlaridan izza bo‘lib, o‘z xohishlariga ko‘ra, egallab turgan lavozimlaridan ozod qilishini so‘rab ariza yozgan.
Avvalroq Buxoroda OAVga noto‘g‘ri ma’lumot bergan maktab direktori o‘z arizasiga ko‘ra ishdan bo‘shagani to‘g‘risida xabar berilgandi.
Izoh (0)