Toshkent viloyatida 2021-yilning 20-mart holatiga ko‘ra, koronavirus infeksiyasiga chalingan fuqarolar Zangiota tumani hududidagi 1- va 2- ko‘p tarmoqli klinikaga joylashtirilgan. Bu haqda Toshkent viloyat hokimligi axborot xizmati viloyat Sog‘liqni saqlash boshqarmasi boshlig‘i To‘raqul Arziqulovga tayanib xabar berdi.
Qayd etilishicha, viloyatda 2020-yilning 15-martidan buyon ushbu kasallikni yuqtirgan 130 nafar bemor vafot etgan bo‘lsa, shifoxonalarda davolangan 15 ming 681 nafar kishi sog‘ayib chiqqan.
Sog‘liqni saqlash vazirligi matbuot xizmati hududlar kesimida o‘lim statistikasini so‘nggi bor 2020-yil 21-sentabr kuni taqdim etgan. Unga ko‘ra, o‘sha vaqtda Toshkent viloyatidagi COVID-19 qurbonlari soni 67 nafar edi. Shunda pandemiyaning birinchi 190 kunida Toshkent viloyatida 67 kishi o‘lgan bo‘lsa, undan keyingi 185 kunida (2020-yil 21-sentabrdan 2021-yil 21-martga qadar) yana 63 kishi vafot etgan.
Bugungi kunda ushbu yuqumli dardning qayta tarqalayotganligi oqibatida 2021-yilning 12-, 15-mart kunlari 4 nafar, 16-mart kuni esa 18 nafar, 17-martda — 8 nafar, 18-martda — 13 nafar, 19-martda —10 nafar kishida infeksiya alomatlari aniqlangan. Ular Zangiotadagi ikkita ko‘p tarmoqli yuqumli kasalliklar shifoxonasida davolanmoqda. Qolgan 93 nafar bemorga esa uy sharoitida davolanish tavsiya etilgan.
Ta’kidlanishicha, viloyatning tuman va shaharlari aholisi o‘rtasida koronavirus infeksiyasini yuqtirayotganlar soni ortishi kuzatilmoqda. Xususan, o‘tgan 6 kun mobaynida Toshkent va Qibray tumanlarida 14 nafardan, O‘rta Chirchiq tumani va Nurafshon shahrida 5 nafardan, Chirchiq shahrida 9 nafar, Zangiota tumanida esa 4 nafar kishi infeksiyaga chalingan.
Viloyatdagi tibbiyot muassasalari o‘tgan yilgi tajribadan kelib chiqib, jami 970 nafar bemorga mo‘ljallangan zaxira o‘rinlari hozirlangan. COVID-19 kasalligini boshidan o‘tkazgan fuqarolar uchun tibbiyot muassasalarida 330 ta reabilitatsiya o‘rinlari mavjud. Kasallarni davolash uchun ishlatiladigan 49 turdagi jami 2 mlrd 908 mln so‘mlik dori vositalari ham jamlangan.
“Aholiga esa xavotirlanishga o‘rin yo‘q, deya olmaymiz. Chunki beparvolik, xotirjamlik infeksiyaning yana tarqalishiga olib kelishi mumkin. Karantin yumshatilgan, lekin bekor qilingani yo‘q. Shuning uchun fuqarolardan niqob taqib yurish, antiseptik vositalardan foydalanish, joylarda odamlar orasida masofani saqlash talab etiladi. Shu o‘rinda jamoatchilik vakillaridan ham, ayniqsa, mahalla, maktab, bog‘cha va boshqa muassasalar rahbarlaridan koronavirus infeksiyasi tarqalishining oldini olish uchun o‘z nazoratlari ostidagi joylarda e’tiborni yana bir karra oshirishlarini so‘rar edik. Kirish joylarida dezinfeksiya, tana haroratini o‘lchab ko‘rish ishlari davom etishi kerak”, — deydi viloyat SSB boshlig‘i.
Eslatib o‘tamiz, Shavkat Mirziyoyev 2020-yilning 28-avgustida o‘tkazilgan yig‘ilishda O‘zbekistonda koronavirus bo‘yicha haqiqiy holat raqamlarini yashirishga mutlaqo yo‘l qo‘ymaslik to‘g‘risida barcha rahbarlarni ogohlantirgandi. Bunga urinish jinoiy javobgarlikkacha bo‘lgan qat’iy choralarga olib kelishi mumkinligi ta’kidlangandi. “Yuksalish” umummilliy harakati ham koronavirus bo‘yicha haqiqiy statistikani yashirmaslikka chaqirgan.
Sog‘liqni saqlash vazirligidagilar esa koronavirus statistikasini soxtalashtirishdan manfaatdor emasligini ta’kidlab keladi. Vazirlik rahbari esa rasmiy statistikaga to‘la ishonadi.
Izoh (0)