Shvetsiya kompaniyalari “Sputnik V”ni ishlab chiqarishga tayyor, Italiyada esa vaksina sinovdan o‘tkaziladi

Shvetsiyaning bir nechta kompaniyalari Rossiyaning koronavirusga qarshi “Sputnik V” vaksinasini ishlab chiqarishga tayyorligini ma’lum qildi, deb yozadi “RBK” mahalliy OAVlarga tayanib.

Shvetsiya hukumati avvalroq Vinnova innovatsiyalar agentligiga Shvetsiyaning o‘zida vaksina ishlab chiqarishni tashkil qilish imkoniyatini ko‘rib chiqishni topshirgan edi. Shundan keyin bir nechta kompaniyalar “Sputnik V” ishlab chiqarishga qiziqish bildirgan.

“Albatta, ishlab chiqarish quvvatlari moslashmaganligidan iborat muammo bugungi kunda mavjud, ammo bizda, shubhasiz, vaksinani muayyan bir hajmda ishlab chiqarish imkoniyati bor”, — dedi Vinnova bo‘lim boshlig‘i Lars Xammarstryom.

Rossiya vaksinasini Shvetsiyada ishlab chiqarish imkoniyati haqida vaksinatsiya kampaniyasi koordinatori Rikar Bergstryom ham aytib o‘tdi. “Ayni paytda Shvetsiya ishlab chiqaruvchilari ‘Sputnik V’ ishlab chiqarish imkoniyati haqida jiddiy muzokaralar olib bormoqda. Boshqa hech narsa ayta olmayman”, — dedi u.

Italiyada esa “Sputnik V” ustida sinovlar olib boriladi. U bilan bog‘liq ilmiy eksperimentlar Spallansani institutida o‘tkaziladi.

“EMA (Yevropa dori vositalari agentligi)ning shtammlar tadqiqoti bo‘yicha rasmiy ruxsatini kutish jarayonida bir necha kundan keyin Spallansani instituti bilan ‘Sputnik V’ vaksinasi ustidagi ilmiy eksperimentlar haqida birinchi bitim tuziladi”, — dedi Italiyaning Latsio viloyati gubernatori Nikola Zingaretti.

Avvalroq Italiya bosh vaziri Mario Dragi EMA “Sputnik V” vaksinasini ma’qullamasa, mamlakat bunday qarorni mustaqil qabul qilishi mumkinligini aytgandi.

Shunga o‘xshash fikrni Germaniya kansleri Angela Merkel ham bildirgan bo‘lib, Yevroittifoq liniyasi orqali markazlashgan holda yetkazib berilmasa, Rossiyaning koronavirusga qarshi vaksinasini mustaqil sotib olishini ma’lum qilgandi.

Fransiya esa EMA tomonidan ma’qullanganidan keyin, “Sputnik V”dan foydalanishga tayyorligini ma’lum qildi.

Yevropa regulyatori Yevroittifoq hududida Rossiya vaksinasidan foydalanishga ruxsat berganicha yo‘q, ayni paytda dorini tekshirish jarayoni davom etmoqda. Ammo vaksina Vengriya va Slovakiyada allaqachon ma’qullandi. Ular dorini ro‘yxatdan o‘tkazish jarayonini tezlashtirib, uni qo‘llash yuzasidan javobgarlikni o‘z zimmasiga oldi.