Ispaniyada ilk bor Amerika yovvoyi qorako‘zanlarida koronavirus infeksiyasi borligi aniqlandi, deb yozmoqda Periodico nashri.

Avval SARS-CoV-2 faqat qorako‘zanlar boqiladigan fermalarda qayd etilgandi. O‘tgan yili iyul oyida SARS-CoV-2 Puebla-de-Valverde (Aragon avtonom birlashmasi) munitsipalitetidagi fermadagi hayvonlarda aniqlangan. O‘shanda mahalliy hukumat 90 mingdan ziyod qorako‘zanni yo‘q qilish haqida qaror qabul qilgan. 2021-yil yanvar oyida La-Korunya provinsiyasidagi ko‘zanlar yetishtiriladigan fermada yana koronavirus borligi ma’lum bo‘ldi, bu yerda ham qorako‘zanlarni yo‘q qilish yuzasidan topshiriq berilgan.

Valensiya Qishloq xo‘jaligi vazirligi ikki nafar o‘lik yovvoyi qorako‘zanda koronavirus aniqlangani haqida xabar bergan. Mahalliy hukumat mazkur holatda kasallikning odamga yuqish ehtimoli yo‘qligini bildirgan.

Amerika qorako‘zani – Ispaniyada yarim tabiiy ravishda yovvoyilashadigan tur hisoblanadi. Asosan fermalardan qochib ketgan qorako‘zanlar tabiat sharoitida yovvoyilashib boradi. Xavfsizlik nuqtayi nazaridan mazkur turga mansub hayvonlarni ushlash yoki ovlash vaqtincha to‘xtatilgan.

COVID-19 boshqa mamlakatlardagi qorako‘zanlar yetishtiriladigan fermalarda ham aniqlangan. Jahon sog‘liqni saqlash tashkiloti SARS-CoV-2 virusining Daniya, Niderlandiya, Polsha, Ispaniya, Shvetsiya, Irlandiya, Italiya va AQShdagi qorako‘zanlar yetishtiriladigan fermalarda aniqlanganini ma’lum qilgan.

Litva 2020-yil dekabr oyida Ionov hududida 1,2 mingta qorako‘zan koronavirus oqibatida halok bo‘lgani, yana 40 mingta ko‘zanlar uxlatib o‘ldirilishini xabar qilgan.