Швеция компаниялари «Спутник V»ни ишлаб чиқаришга тайёр, Италияда эса вакцина синовдан ўтказилади

Швециянинг бир нечта компаниялари Россиянинг коронавирусга қарши «Спутник V» вакцинасини ишлаб чиқаришга тайёрлигини маълум қилди, деб ёзади «РБК» маҳаллий ОАВларга таяниб.

Швеция ҳукумати аввалроқ Vinnova инновациялар агентлигига Швециянинг ўзида вакцина ишлаб чиқаришни ташкил қилиш имкониятини кўриб чиқишни топширган эди. Шундан кейин бир нечта компаниялар «Спутник V» ишлаб чиқаришга қизиқиш билдирган.

«Албатта, ишлаб чиқариш қувватлари мослашмаганлигидан иборат муаммо бугунги кунда мавжуд, аммо бизда, шубҳасиз, вакцинани муайян бир ҳажмда ишлаб чиқариш имконияти бор», — деди Vinnova бўлим бошлиғи Ларс Хаммарстрём.

Россия вакцинасини Швецияда ишлаб чиқариш имконияти ҳақида вакцинация кампанияси координатори Рикар Бергстрём ҳам айтиб ўтди. «Айни пайтда Швеция ишлаб чиқарувчилари ‘Спутник V’ ишлаб чиқариш имконияти ҳақида жиддий музокаралар олиб бормоқда. Бошқа ҳеч нарса айта олмайман», — деди у.

Италияда эса «Спутник V» устида синовлар олиб борилади. У билан боғлиқ илмий экспериментлар Спаллансани институтида ўтказилади.

«EМА (Европа дори воситалари агентлиги)нинг штаммлар тадқиқоти бўйича расмий рухсатини кутиш жараёнида бир неча кундан кейин Спаллансани институти билан ‘Спутник V’ вакцинаси устидаги илмий экспериментлар ҳақида биринчи битим тузилади», — деди Италиянинг Лацио вилояти губернатори Никола Зингаретти.

Аввалроқ Италия бош вазири Марио Драги EМА «Спутник V» вакцинасини маъқулламаса, мамлакат бундай қарорни мустақил қабул қилиши мумкинлигини айтганди.

Шунга ўхшаш фикрни Германия канцлери Ангела Меркель ҳам билдирган бўлиб, Евроиттифоқ линияси орқали марказлашган ҳолда етказиб берилмаса, Россиянинг коронавирусга қарши вакцинасини мустақил сотиб олишини маълум қилганди.

Франция эса EМА томонидан маъқулланганидан кейин, «Спутник V»дан фойдаланишга тайёрлигини маълум қилди.

Европа регулятори Евроиттифоқ ҳудудида Россия вакцинасидан фойдаланишга рухсат берганича йўқ, айни пайтда дорини текшириш жараёни давом этмоқда. Аммо вакцина Венгрия ва Словакияда аллақачон маъқулланди. Улар дорини рўйхатдан ўтказиш жараёнини тезлаштириб, уни қўллаш юзасидан жавобгарликни ўз зиммасига олди.