Koronavirus pandemiyasi tufayli 2020-yil Tokioda bo‘lib o‘tadigan Olimpiada o‘yinlarida chet ellik tomoshabinlar ishtirok eta olmaydi. Bu haqda Xalqaro Olimpiya qo‘mitasi va Yaponiya hukumati vakillari o‘rtasida bo‘lib o‘tgan onlayn uchrashuvdan so‘ng Olimpiya o‘yinlari tashkiliy qo‘mitasi ma’lum qildi, deb yozadi “Interfaks”.
“Olimpiadaga chipta sotib olgan chet elliklar uchun vaziyatni aniqlashtirish va ularning mazkur pandemiya sharoitidagi sayohat rejalariga oydinlik kiritishni maqsad qilgan Yaponiya hukumatining xulosasiga ko‘ra, ular Olimpiya va Paralimpiya o‘yinlarini tomosha qilish uchun Yaponiyaga kela olmaydi”. — deyiladi qo‘mita bayonotida.
Shu bilan birga, bayonot mualliflari tez orada chet ellik muxlislar uchun chiptalarni qaytarib berish mexanizmi haqidagi izohlarni taqdim etishga va’da berdi.
Kyodo News agentligining ta’kidlashicha, tashkilotchilar chet ellik ko‘ngillilarni ham qabul qilmaydigan bo‘ldi. Olimpiada o‘yinlarini 2021-yilga qoldirish to‘g‘risida qaror qabul qilingan paytda tashkiliy ishlardagi 80 ming ko‘ngillilarning taxminan 10 foizi chet el fuqarolariga to‘g‘ri kelgan. Shu bilan birga, rasmiylar Yaponiyada topilishi qiyin bo‘lgan ko‘ngillilar, masalan, kamchilik gaplashadigan tillarda so‘zlashuvchilarning o‘yinga kelishi ehtimolini o‘rganmoqda.
Agentlikning xabar berishicha, Olimpiada chiptalarining 1 millionga yaqini chet elliklarga sotilgan bo‘lishi mumkin.
Tokio Olimpiya va Paralimpiya o‘yinlari 2020-yil yozida bo‘lib o‘tishi kerak edi, lekin koronavirus pandemiyasi tufayli ular 2021-yilga qoldirildi. Endi Olimpiada 23-iyuldan 8-avgustgacha, Paralimpiya o‘yinlari 24-avgustdan 5-sentabrgacha bo‘lib o‘tadi.
Shuningdek, Yaponiyada Olimpiada mash’alasi estafetasining 25-mart kuni Fukusimada boshlanadigan birinchi qismi tomoshabinlarsiz o‘tishi ma’lum qilingan.
Avvalroq Yaponiya kompaniyalarining yarmidan ko‘pi 2021-yilgi Olimpiada o‘yinlariga qarshi ekanini bildirgan edi.
Izoh (0)