Jizzaxda suvosti hayvonot olami va o‘simliklarga zararli tarzda baliq ovlagan shaxslar qo‘lga olindi. Bu haqda viloyat Ekologiya va atrof muhitni muhofaza qilish boshqarmasi matbuot kotibiga tayanib, “Zamon” informatsion dasturi xabar qildi.
Qayd etilishicha, tungi soat 03:30 lar atrofida Aydar–Arnasoy ko‘llar tizimi Tuzkon bo‘limi 94-kontur suv maydoni hududida Arnasoy tumani “Chinobod” MFYda yashovchi fuqarolar tomonidan taqiqlangan ov quroli bo‘lgan elektr qarmoq yordamida jami 44 ta baliq ovlangani aniqlangan.
Ushbu holat yuzasidan hujjatlar rasmiylashtirilganda hayvonot dunyosiga 10 million 94 ming so‘m zarar yetkazilgani aniqlandi.
Fuqarolardan ashyoviy dalil sifatida 44 ta baliq, 2 dona elektr qarmoq, 2 dona rezina qayiq, 1 dona nasos, 4 dona akkumulyator, 2 dona “sochok” baliq ovlash moslamasi olindi.
Bundan avval Buxoroda noqonuniy ravishda yovvoyi quyon ovlagan brakonyerlar qo‘lga olingani, Yunusobodda daraxtga osilib qolgan cho‘l burguti qutqarilgani hamda Navoiyda “Qizil kitob”ga kiritilgan qushlarni ovlagan brakonyer ushlangani haqida xabar berilgandi.
Izoh (0)