Farg‘onada ichki ishlar organlariga ishga kiritib qo‘yish uchun ayoldan 2 ming dollar talab qilganlar qo‘lga olindi

Farg‘ona viloyatida ayol kishini ichki ishlar organlariga ishga kiritib qo‘yishni va’da qilib, undan pul so‘ragan shaxslar ushlandi, deya xabar bermoqda O‘zA.

Qayd etilishicha, fuqaro Sh.L. (ayol) Farg‘ona viloyati ichki ishlar boshqarmasiga murojaat qilib, unda fuqaro X.Sh, B.U. ismli tanishlari 2000 AQSh dollari evaziga ichki ishlar organlariga ishga kiritib qo‘yishi mumkinligini aytib, oldindan 300 AQSh dollari miqdoridagi pullarni talab qilayotganini ma’lum qilgan va fuqaro X.Sh.ga qonuniy chora ko‘rishni so‘ragan.

Holat yuzasidan IIV O‘z xavfsizligi boshqarmasi Farg‘ona viloyati bo‘yicha bo‘limi xodimlari tomonidan o‘tkazilgan tezkor tadbir davomida X.Sh. Sh.L.dan Farg‘ona shahri hududida kelishilgan pullardan 200 AQSh dollari miqdoridagi pulni pora tariqasida olayotgan vaqtida tadbir ishtirokchilari tomonidan ushlangan. Ushbu pullar xolislar ishtirokida daliliy ashyo tariqasida rasmiylashtirib olindi.

Mazkur holat yuzasidan tegishli tartibda protsessual hujjatlar rasmiylashtirilib, Farg‘ona viloyati IIB huzuridagi Tergov boshqarmasiga yuborildi.

Bundan avval “Toshkent shahar suv ta’minoti” direktori o‘rinbosari 3 million so‘m pora olayotganda qo‘lga olingani, Navoiyda tadbirkorga tegishli yerni 150 ming dollarga sotishga uringan shaxs ushlangani hamda Samarqandda fuqaroni “ayollar daftari”ga kiritish uchun 500 dollar talab qilgan mahalla raisiga jinoyat ishi qo‘zg‘atilgani haqida xabar berilgandi.