Жиззахда сувости ҳайвонот олами ва ўсимликларга зарарли тарзда балиқ овлаган шахслар қўлга олинди. Бу ҳақда вилоят Экология ва атроф муҳитни муҳофаза қилиш бошқармаси матбуот котибига таяниб, «Замон» информацион дастури хабар қилди.
Қайд этилишича, тунги соат 03:30 лар атрофида Айдар–Арнасой кўллар тизими Тузкон бўлими 94-контур сув майдони ҳудудида Арнасой тумани «Чинобод» МФЙда яшовчи фуқаролар томонидан тақиқланган ов қуроли бўлган электр қармоқ ёрдамида жами 44 та балиқ овлангани аниқланган.
Ушбу ҳолат юзасидан ҳужжатлар расмийлаштирилганда ҳайвонот дунёсига 10 миллион 94 минг сўм зарар етказилгани аниқланди.
Фуқаролардан ашёвий далил сифатида 44 та балиқ, 2 дона электр қармоқ, 2 дона резина қайиқ, 1 дона насос, 4 дона аккумулятор, 2 дона «сочок» балиқ овлаш мосламаси олинди.
Бундан аввал Бухорода ноқонуний равишда ёввойи қуён овлаган браконьерлар қўлга олингани, Юнусободда дарахтга осилиб қолган чўл бургути қутқарилгани ҳамда Навоийда «Қизил китоб»га киритилган қушларни овлаган браконьер ушлангани ҳақида хабар берилганди.
Изоҳ (0)