Namangan viloyati Kosonsoy tumanida fermer xo‘jaligi direktori hamda ularning ishchilarini urib, tan jarohati yetkazgan shaxslarga nisbatan jinoyat ishi qo‘zg‘atildi, deb xabar beradi Tergov departamenti.
Ma’lum qilinishicha, 17-mart kuni soat 12:30 larda 24 yoshli Tohir B. va 34 yoshli Mahmud O. Kosonsoy tumani “O‘zbekiston” MFY hududida joylashgan bog‘dorchilikka asoslangan fermer xo‘jaligiga kelib, ushbu xo‘jalik direktori 55 yoshli Kamol M.ni hamda uning besh nafar ishchisini kaltaklagan. Shuningdek, ular fermer xo‘jaligi ishchilariga tegishli bo‘lgan Nexia-3, “Niva”, Hyundai, Mercedes-Benz rusumli avtomashinalari, Samsung rusumli ekskavator, fermer xo‘jaligining dala shiyponi oynalarini tosh bilan urib shikastlagan.
Mazkur holat yuzasidan Kosonsoy tuman IIB huzuridagi Tergov bo‘limi tomonidan Tohir B. va Mahmud O.ga nisbatan Jinoyat kodeksining 277-moddasi 3-qismi “g” bandi (bezorilik) bilan jinoyat ishi qo‘zg‘atilgan.
Olib borilgan tergov harakatlari davomida ushbu fermer xo‘jaligining direktori Kamol M.ning oldiga “O‘zbekiston” MFYda yashovchi fuqarolar Dilfuza va uning singlisi Nigora kelib, go‘yoki mahalladagi yerlarni o‘zboshimchalik bilan egallab olayotganligini ro‘kach qilib, u bilan nizolashgan. Bu haqda ular hamqishloqlariga borib aytib, o‘zlari bilan 50-60 nafar ayol va erkakni fermer xo‘jaligining yer maydoniga boshlab kelgan. Janjal shuning natijasida kelib chiqqan.
“Jinoyat ishi doirasida barcha fuqarolarning shaxsi aniqlanib, ularning har birining xatti-harakatiga qonuniy baho berilishi ta’minlanadi”, — deyiladi xabarda.
Avvalroq Toshkentda Akfa Medline shifoxonasi qo‘riqchisini kaltaklagan ikki kishiga jinoiy ish qo‘zg‘atilgani, Sergelida 40 yoshli erkakni yarim tunda kaltaklagan shaxslar qo‘lga olingani, shuningdek, Toshkentda kaltaklangan fuqarolar qasdini olish maqsadida mebel do‘konini yoqib yuborib, 600 million so‘m zarar yetkazgani to‘g‘risida xabar berilgandi.
Izoh (0)