Surxondaryoning Sariosiyo tumanidagi “Sharg‘unko‘mir” ko‘mir konini elektr toki o‘chganda favqulodda holatda shoshilinch elektr energiyasi bilan ta’minlovchi generatorning ikki akkumulyatorini o‘g‘irlab ketgan shaxslarga jinoyat ishi qo‘zg‘atildi. Bu haqda IIV Tergov departamenti xabar berdi.
Ma’lum qilinishicha, “Sharg‘unko‘mir” AJning Xitoy bo‘limi direktorining moliyaviy ishlar bo‘yicha o‘rinbosari Ge Cheng Hui Sariosiyo tumani IIB boshlig‘iga ariza bilan murojaat qilib, 13-mart kuni noma’lum shaxslar “Sharg‘unko‘mir” AJning Xitoy bo‘limiga tegishli doimiy elektr toki o‘chganda favqulodda holatda shoshilinch ko‘mir konini elektr energiyasi bilan ta’minlovchi generatorning jami narxi 17 million 790 ming so‘mlik 2 dona akkumulyatorini yashirin ravishda o‘g‘irlab ketganini ma’lum qilgan.
Olib borilgan tezkor qidiruv harakatlari davomida ushbu jinoyatni AJ “Sharg‘unko‘mir” tunneli ishchisi 21 yoshli S.U. va muqaddam sudlangan 28 yoshli O.Y.lar sodir etgani, ular o‘g‘irlangan 2 dona akkumulyatorni daraxt tagiga yashirib qo‘ygani aniqlanib, ashyoviy dalil tariqasida rasmiylashtirib olingan.
Holat yuzasidan Sariosiyo tumani IIB huzuridagi Tergov bo‘linmasi tomonidan S.U. va O.Y.ga nisbatan Jinoyat kodeksining 169-moddasi (o‘g‘rilik) 2-qismi “v” va “g” bandlari bilan jinoyat ishi qo‘zg‘atilgan.
Hozirda tergov harakatlari olib borilmoqda.
Izoh (0)