Qo‘shma Shtatlarga Markaziy Amerikadan so‘nggi 20 yil ichida rekord darajada ko‘p noqonuniy muhojirlarning kelishi kutilmoqda. Bu haqda AQSh Ichki xavfsizlik vazirligi veb-saytida ma’lum qilindi, deb yozadi “TASS”.
“Mamlakatning janubi-g‘arbiy chegarasida ahvol murakkab. Vaziyatning borishini kuzatib turibmiz. Janubi-g‘arbiy chegaradan o‘tgan muhojirlar oqimi yaqinda so‘nggi 20 yil ichidagi eng katta oqimga aylanadi. Biz asosan kattalar va oilalarni o‘tkazyapmiz, qarovsiz bolalarni o‘tkazmayapmiz”, — dedi vazirlik rahbari Alexandro Mayorkas.
ABC telekanali ma’lumotlariga ko‘ra, 15-mart kuni chegaradan o‘tuvchilar tarkibida 4,8 ming nafar voyaga yetmagan noqonuniy muhojir bo‘lgan, bu o‘tgan haftaning o‘rtalaridagi ko‘rsatkichdan 25 foiz ko‘proq va bu ko‘rsatkich barqaror o‘sishda davom etmoqda. Ushbu protsedura muhojirlarni keyingi taqdiri to‘g‘risida qaror qabul qilinguncha boshpanalarga o‘tkazishni nazarda tutadi, ammo bu aftidan, muammoli masala, chunki boshpanalar haddan tashqari to‘lib ketgan.
Dam olish kunlari AQSh Ichki xavfsizlik vazirligi mamlakat Favqulodda vaziyatlarni boshqarish federal agentligidan tobora yomonlashib borayotgan muammoni hal qilishda yordam so‘rashga majbur bo‘ldi.
Eslatib o‘tamiz, AQSh prezidenti Jo Bayden sobiq prezident Donald Tramp tomonidan AQSh—Meksika chegarasidagi vaziyat munosabati bilan joriy qilingan favqulodda holatni bekor qilgan edi. Tramp Markaziy Amerika shtatlaridan kelgan noqonuniy muhojirlar jinoyatchilar ekaniga aminligini bildirgan edi.
Avvalroq AQSh va Meksika prezidentlari muhojirlar va koronavirusga qarshi kurash bo‘yicha hamkorlik qilishga kelishib olgani haqida xabar berilgandi. Ta’kidlanishicha, har ikki davlat rahbarlari iqtisodiy o‘sishda, madaniy xilma-xillikda “muhojirlarning muhim o‘rnini e’tirof etdi” va “migrantlarning qadr-qimmatini tan oladigan, xavfsiz va muntazam immigratsiya siyosatiga sodiqligini e’lon qildi”.
Izoh (0)