Eron hukumati mamlakatda ishlab chiqilgan va halok bo‘lgan Muhsin Faxrizoda sharafiga “Faxra” nomini olgan vaksinaning odamlardagi klinik sinovlariga start berilganini ma’lum qildi, deya xabar bergan Press TV.
Tehron 2020-yil noyabr oyida o‘ldirib ketilgan yadroshunos olim Faxrizodaning o‘limida Isroilni ayblamoqda. Olimning o‘g‘li mazkur vaksinadan birinchilardan bo‘lib emlangan. Odamlardagi klinik sinovlardan oldin “Faxra” vaksinasi 650 ta turli hayvonda, xususan, sichqonlar, quyonlar, dengiz cho‘chqalari va maymunlarda test qilingan.
Eron hukumati preparatni ommaviy ishlab chiqarish ishlarini tashkil qilish maqsadida maxsus korxonanini loyihalashtirish hamda qurish ishlarini boshlab yuborgan. Fabrika yozda ishga tushiriladi.
Eron ayni kungacha Rossiya, Xitoy, Hindiston va Kubadan jami 1 million 260 ming dozadagi COVID-19 koronavirus infeksiyasiga qarshi vaksinani import qilgan. Mamlakatda COVID-19 pandemiyasi boshlanganidan beri 1,7 million nafardan ortiq kishida koronavirus aniqlangan va 61 mingdan ziyod bemor kasallik asoratlari oqibatida vafot etgan.
Eslatib o‘tamiz, 2020-yil 27-noyabrda Faxrizodaning terrorchilik harakati qurboni bo‘lgani haqida xabar berilgan. Mahalliy Press TV telekanali olimga qilingan suiqasdda ishlatilgan qurollar, mazkur qotillikning o‘ziga xos belgilari va xususiyatlari mudhish reja ortida Isroil turganiga ishora qilayotganini yozgan. Isroil bosh vaziri Binyamin Netanyaxu eronlik olimning o‘ldirib ketilishiga Isroilning aloqasi yo‘qligini bildirgan.
Izoh (0)