Buyuk Britaniya hukumati mamlakatda mudofaa va tashqi siyosatning qayta ko‘rib chiqilishi masalasi bo‘yicha 2021-yilda korrupsiyaga qo‘l urgan amaldorlarga qarshi yangi, keng qamrovli sanksiyalarni joriy etishni rejalashtirmoqda. Bu haqda “Interfaks” xabar berdi.
Buyuk Britaniyada 2021-yilda korrupsiyaga aloqador mansabdor shaxslarga qarshi ikkinchi keng qamrovli sanksiya rejimi joriy etiladi, unga binoan korrupsiyaga aloqador yoki Buyuk Britaniyaning moliyaviy tizimi orqali pulni qayta yo‘naltirishni amalga oshirgan shaxslarning mamlakatga erkin kirishi taqiqlanishi mumkin, deyiladi hukumat bayonotida.
Ta’kidlanishicha, bunday choralar Britaniya hukumatiga korrupsiyaga qarshi kurashning mavjud vositalarini to‘ldirishga va shu kabi rejimga ega bo‘lgan AQSh va Kanada bilan hamkorlikni yaxshilashga yordam beradi.
“Biz sanksiyalar rejimidan qadriyatlarimiz va manfaatlarimizni ilgari surish, shuningdek, davlatga tahdidlar, terrorizm, kiberhujumlarga qarshi kurashish, kimyoviy quroldan foydalanish va uni tarqatishga qarshi kurashish uchun kompleks yondashuvning bir qismi sifatida foydalanamiz”, — deya ta’kidlanadi bayonotda.
Avvalroq Qozog‘istonning korrupsiyaga qarshi kurashish agentligi mamlakatda poraxo‘r amaldorni ko‘cha tozalatish orqali jazolashni taklif qilgandi. Xabarga ko‘ra, ushbu turdagi jazo psixologik jihatdan ancha samarali bo‘lib, jamiyat o‘z “qahramonlarini” tanib oladi.
Izoh (0)