“Oq fil” kinotanqidchilik va kinomatbuot milliy mukofotining Ekspertlar kengashi ushbu mukofotni ta’sis etgan Rossiya Federatsiyasi Kinematografchilar uyushmasining Kinoshunoslar va kinotanqidchilar gildiyasi boshqarmasi bilan ziddiyat kelib chiqqanini ma’lum qildi. Kengash bayonoti “Hujjatli kino va televideniye gildiyasi” notijorat tashkiloti saytiga joylashtirildi, deb yozadi Meduza.
Mojaro Kinematografchilar uyushmasi a’zolari, shuningdek, unga a’zo bo‘lmagan tanqidchilar va jurnalistlarni o‘z ichiga olgan “Oq fil” Ekspertlar kengashi tomonidan 2020-yilgi mukofotni muhokama qilish paytida Aleksey Navalniy va uning ijodiy guruhini “surishtiruv tergov hujjatli filmlari uchun ‘Yil voqeasi’ nominatsiyasi bo‘yicha” mukofotlash to‘g‘risida qaror qabul qilgandan keyin boshlangan.
“Mazkur qaror tufayli mukofot ta’sis etilgan 22 yil ichida birinchi marta Ekspertlar kengashi va Gildiya boshqarmasi o‘rtasida ziddiyat kelib chiqdi. Bundan tashqari, Kinematografchilar uyushmasi gildiyani va ushbu tashkilotga a’zo bo‘lmagan boshqa kinoshunoslarni Ekspertlar kengashi tarkibidan chiqarishni talab qildi. Ekspertlar kengashi bosim va senzurali aralashishga urinishlarga duch keldi, bu mukofot qoidalari va kengash a’zolarining irodasini erkin ifoda etish ruhiga ziddir”, — deyiladi bayonotda.
Gildiya boshqarmasi rahbari Razlogovning 25-fevraldagi bayonotiga ko‘ra, gildiya kelishmovchilik sababini “Oq fil” Ekspertlari kengashi tashkilotda yetakchi rolni “Rossiya Kinematografchilar uyushmasi va shunga muvofiq, Kinoshunoslar va kinotanqidchilar gildiyasiga a’zo bo‘lmagan tanqidchilar va ekspertlar o‘ynashi kerakligini” targ‘ib qilgani bilan izohlagan.
Mukofot Ekspertlar kengashining bayonotida aytilishicha, “yuzaga kelgan qarama-qarshilik Kinematografchilar uyushmasi ichidagi azaliy o‘zgarmas kuch va turg‘unlik garovi bo‘lib kelayotgan Gildiya boshqarmasining obro‘siga putur yetkazadi”. Kengash vakillari, shuningdek, “2020-yil oxirida ‘Oq fil’ mukofotini topshirish hamda uning kelajagi uchun javobgarlikni” o‘z zimmasiga olishini bildirgan.
Ekspertlar kengashining bayonotiga 40 dan ortiq odam, jumladan, “Seans” jurnalining asoschisi Lyubov Arkus, kinoshunoslar Anton Dolin, Yuriy Bogomolov va Yuriy Gladilshikov imzo chekkan.
Fevral oyida “Sobesednik” gazetasi Aleksey Navalniy jamoasi tomonidan 2021-yilning yanvar oyida chiqarilgan “Putinning qasri” filmi “Oq fil” mukofotiga taklif qilingani haqida xabar qildi. Rossiya Kinematografchilar uyushmasi bu xabar haqiqatan yiroq ekanini aytdi, chunki “Rossiyada 2020-yil 1-yanvardan 31-dekabriga qadar premyera qilingan” filmlargina 2020-yilgi mukofotga qabul qilinadi.
Ma’lumot uchun, Rossiya Kinematograflar uyushmasi rejissor Nikita Mixalkov tomonidan boshqariladi.
Eslatib o‘tamiz, 19-yanvar kuni asoschisi muxolifatchi Aleksey Navalniy bo‘lgan Korrupsiyaga qarshi kurash fondi “Putin uchun qurilgan qasr” haqida katta surishtiruvni e’lon qildi.
Aleksey Navalniy iddao qilishicha, Rossiya prezidenti Gelenjik yaqinida, Qora dengiz sohilida “butun boshli qirollik”ka egalik qiladi, uning maydoni “Monakodek 39 ta knyazlik hududiga teng”.
Keyinroq Rossiya prezidenti Vladimir Putin Korrupsiyaga qarshi kurash fondi (KKF) surishtiruvida tilga olingan Gelinjikdagi qasrga na u, na uning qarindoshlari egalik qilishini bildirdi. “U yerda mening mulkim sifatida ko‘rsatilgan narsalarning hech biri na menga, na mening yaqin qarindoshlarimga tegishli emas va hech qachon tegishli bo‘lmagan. Hech qachon”, — dedi Vladimir Putin.
Izoh (0)