Xitoy hukumati favqulodda vaziyatlarda foydalanish uchun koronavirusga qarshi to‘rtinchi vaksinasini tasdiqladi. Preparatni tayyorlashda Xitoy og‘maxonining tuxumdonidagi hujayralardan foydalaniladi, deb yozmoqda Global Times.
Ta’kidlanishicha, vaksina Xitoy kasalliklarni nazorat qilish va oldini olish markazi hamda Xitoy Fanlar akademiyasining direktori, akademik Gao Fu boshchiligidagi xitoylik olimlar guruhi tomonidan ishlab chiqilgan.
Xitoy Fanlar akademiyasining ta’kidlashicha, vaksinaning birinchi va ikkinchi bosqich klinik sinovlari 2020-yil oktabr oyida yakunlagan. Natijalarning ko‘rsatishicha, to‘liq emlanishdan so‘ng sinov ishtirokchilarida jiddiy nojo‘ya reaksiyalar kuzatilmagan. Hisobotda aytilishicha, vaksinaning qonda ishlab chiqargan neytrallashtiruvchi (zararsizlantiruvchi) antitanalari darajasini hozirgi kunda dunyoda qo‘llanilayotgan boshqa rekombinant oqsil vaksinalari va mRNK vaksinalari bilan taqqoslash mumkin.
Vaksinaning uchinchi bosqich klinik sinovlari 2020-yil noyabr oyida Xitoy, O‘zbekiston, Pokiston, Ekvador va Indoneziyada boshlandi, ushbu bosqichda 29 ming ishtirokchini emlash rejalashtirilgan edi.
Ta’kidlanishicha, uchinchi bosqich klinik sinovlari, ayniqsa, sinovni boshlab bergan mamlakat O‘zbekiston tomonidan yuqori tan olinishi tufayli muvaffaqiyatli o‘tmoqda.
22-fevral kuni O‘zbekiston qonun chiqaruvchi organi vaksinani mamlakatdagi favqulodda vaziyatlarda qo‘llashga ruxsat berdi. O‘zbekistonda vaksina 1-mart kuni foydalanishga tasdiqlandi. O‘zbekistonda ushbu vaksina dunyodagi eng xavfsiz va eng samarali vositalardan biri sifatida tan olingan.
Eslatib o‘tamiz, fevral oyining oxirida Xitoy koronavirusga qarshi yana ikkita vaksinasini bozorga kiritishni ma’qullagan. Undan avval Xitoy Sinovac vaksinasidan foydalanishni tasdiqlagan edi. Vaksinaning 79 foiz samaradorlik ko‘rsatgani ma’lum qilingan. 2020-yil dekabr oyida Xitoyning milliy farmatsevtika guruhi (Sinopharm) tarkibiga kiruvchi Pekin instituti tomonidan tasdiqlanganidan so‘ng mazkur preparat Xitoyda keng foydalanish uchun yashil chiroqni olgan ikkinchi COVID-19 vaksinasiga aylangan.
Izoh (0)