Қўшма Штатларга Марказий Америкадан сўнгги 20 йил ичида рекорд даражада кўп ноқонуний муҳожирларнинг келиши кутилмоқда. Бу ҳақда АҚШ Ички хавфсизлик вазирлиги веб-сайтида маълум қилинди, деб ёзади «ТАСС».
«Мамлакатнинг жануби-ғарбий чегарасида аҳвол мураккаб. Вазиятнинг боришини кузатиб турибмиз. Жануби-ғарбий чегарадан ўтган муҳожирлар оқими яқинда сўнгги 20 йил ичидаги энг катта оқимга айланади. Биз асосан катталар ва оилаларни ўтказяпмиз, қаровсиз болаларни ўтказмаяпмиз», — деди вазирлик раҳбари Алехандро Майоркас.
ABC телеканали маълумотларига кўра, 15 март куни чегарадан ўтувчилар таркибида 4,8 минг нафар вояга етмаган ноқонуний муҳожир бўлган, бу ўтган ҳафтанинг ўрталаридаги кўрсаткичдан 25 фоиз кўпроқ ва бу кўрсаткич барқарор ўсишда давом этмоқда. Ушбу процедура муҳожирларни кейинги тақдири тўғрисида қарор қабул қилингунча бошпаналарга ўтказишни назарда тутади, аммо бу афтидан, муаммоли масала, чунки бошпаналар ҳаддан ташқари тўлиб кетган.
Дам олиш кунлари АҚШ Ички хавфсизлик вазирлиги мамлакат Фавқулодда вазиятларни бошқариш федерал агентлигидан тобора ёмонлашиб бораётган муаммони ҳал қилишда ёрдам сўрашга мажбур бўлди.
Эслатиб ўтамиз, АҚШ президенти Жо Байден собиқ президент Дональд Трамп томонидан АҚШ—Мексика чегарасидаги вазият муносабати билан жорий қилинган фавқулодда ҳолатни бекор қилган эди. Трамп Марказий Америка штатларидан келган ноқонуний муҳожирлар жиноятчилар эканига аминлигини билдирган эди.
Аввалроқ АҚШ ва Мексика президентлари муҳожирлар ва коронавирусга қарши кураш бўйича ҳамкорлик қилишга келишиб олгани ҳақида хабар берилганди. Таъкидланишича, ҳар икки давлат раҳбарлари иқтисодий ўсишда, маданий хилма-хилликда «муҳожирларнинг муҳим ўрнини эътироф этди» ва «мигрантларнинг қадр-қимматини тан оладиган, хавфсиз ва мунтазам иммиграция сиёсатига содиқлигини эълон қилди».
Изоҳ (0)