AQShda koronavirusga qarshi emlangan ona antitanaga ega bolani dunyoga keltirdi

AQShda qonida koronavirusdan himoyalovchi antitana mavjud bo‘lgan chaqaloq dunyoga keldi. Bu haqda Tengrinews xabar berdi.

Florida shtatining Boka-Raton shahri pediatrlari Pol Gilbert va Ched Rudnikning aytishicha, bolaning onasi, tibbiyot xodimi bo‘lgan ayol yanvar oyida homiladorlikning 36-haftasida Moderna vaksinasi bilan emlangan. Uch hafta o‘tib esa ayol tetik va sog‘lom qizaloqni dunyoga keltirdi.

Tadqiqotchilar qizcha tug‘ilgandan so‘ng darhol kindik ichakchasidan qon olib tahlil qildi va unda faqatgina onadan o‘tishi mumkin bo‘lgan antitanalar borligini aniqladi.

Mutaxassislarning tasdiqlashicha, bolada antitana faqat vaksinatsiya natijasida hosil bo‘lgan, chunki tug‘ruqqacha onaning koronavirusga topshirgan testi salbiy natija bergan, ya’ni antitanalar uning qonida tabiiy ravishda rivojlangan bo‘lishi mumkin emas.

“Bizga ma’lum bo‘lishicha, bu emlashdan keyin bolaning antitanalar bilan tug‘ilishi bo‘yicha dunyodagi birinchi holat. Shunday ekan, onani emlash orqali SARS-CoV-2 infeksiyasidan himoyalanish va uning xavfini kamaytirish uchun potensial bor. Ushbu holat kelgusi bir necha oy ichida emlangan onalardan minglab shunday bolalar tug‘ilishiga olib keladi”, — dedi doktor Gilbert.

Shifokorlar ularning kashfiyoti keyingi izlanishlarga va ushbu himoya qancha davom etishini aniqlashga turtki bo‘ladi, deb umid bildirdi.

2020-yilning noyabr oyida Singapurda SARS-CoV-2 koronavirusiga qarshi antitanaga ega chaqaloq tug‘ilgani haqida xabar berilgan edi. Singapurda o‘tkazilgan tadqiqot natijasiga ko‘ra, homiladorlik paytida COVID-19’ga chalingan ayollarda kasallik boshqalardagi o‘rtacha ko‘rsatkichdan og‘irroq o‘tmaydi, ularning farzandlari esa koronavirusga qarshi antitana bilan tug‘iladi.

Avvalroq Avstriyadagi Insbruk tibbiyot universiteti olimlari koronavirusga chalinib chiqqanlarda kasallikka qarshi immunitet kamida sakkiz oy davomida saqlanib qolishini aniqlagan edi.

Shuningdek, AQSh hukumati koronavirusiga qarshi kurash doirasida Amerikaning Eli Lilly farmatsevtika kompaniyasi tomonidan ishlab chiqarilgan antitana kokteylidan favqulodda foydalanish uchun ruxsatnomani tasdiqladi.