Hozirgi kunda dunyo aholisining 10 foizidan kamrog‘ida COVID-19’ga qarshi antitana mavjud. Bu haqda Jahon sog‘liqni saqlash tashkiloti (JSST) bosh tadqiqotchisi Sumya Svaminatanga tayanib, “RBK” xabar berdi.

Foto: AP Photo

Dunyo aholisining aksariyat qismi koronavirus bilan kasallangan yirik shaharlarda jamoaviy immunitetiga erishildimi, degan savolga javob berar ekan, mutaxassis dunyo bo‘ylab o‘tkazilgan 500 ga yaqin tadqiqotlarga e’tibor qaratdi. Uning so‘zlariga ko‘ra, tadqiqot natijalari shuni ko‘rsatdiki, hozirgi kunda dunyo aholisining 10 foizidan kamrog‘ida COVID-19’ga qarshi antitanalar mavjud.

“Ba’zi joylarda, ayniqsa, aholi zich joylashgan shaharlarda, aholining 50-60 foizi infeksiyaga chalingan va natijada antitanalar shakllangan hududlar mavjud. Biroq bu butun bir shahar, viloyat yoki mamlakatda jamoaviy immunitetga erishilganini anglatmaydi”, — dedi u.

Svaminatanning so‘zlariga ko‘ra, keng miqyosdagi jamoaviy immunitet emlash orqali paydo bo‘lishi mumkin. Shu sababli mutaxassis ta’kidlaganidek, JSST kambag‘al mamlakatlarga koronavirusga qarshi vaksina yetkazib berishni o‘z ichiga olgan COVAX dasturiga iloji boricha ko‘proq mamlakatlarning qo‘shilishini talab qilmoqda. Ungacha COVID-19 tarqalishini kamaytirish uchun barcha choralarni ko‘rish kerak, deydi mutaxassis.

Avvalroq koronavirusga qarshi emlanishning jamoaviy immunitetdan ustun jihatlari ma’lum qilingan edi. Immunolog Vladimir Bolibokning so‘zlariga ko‘ra, COVID-19 bilan kasallanmagan va emlash jarayonidan o‘tmagan kishi ehtiyot choralarini ko‘rishi kerak, chunki jamoaviy immunitet uni kasallikdan himoya qila olmaydi.

Rossiyalik epidemiolog Natalya Pshenichnaya esa COVID-19 mavsumiy kasallikka aylanishi mumkinligini aytgan. Uning ta’kidlashicha, mavsumiy respirator infeksiyasining ko‘payishi odatda kuz va bahorda kuzatiladi, shuning uchun yilning ushbu davrida COVID-19 bilan kasallanish soni ham ko‘payishi mumkin.