COVID-19’ga qarshi vaksina infeksiyani yuqtirgan va antitanasi bor odam uchun xavfsizdir. Bu haqda Rossiya Tibbiyot universitetining yuqumli kasalliklar kafedrasi dotsenti Vladimir Agafonov so‘zlariga asoslanib, “Interfaks” yozmoqda.

“Bunday kishilarga vaksina olish zarar qilmaydi, aksincha antitanalarning miqdori ko‘payadi. Vaksina immunitet tizimiga xavf solmaydi. Vaksinatsiyalash uchun antitanalarning bor yoki yo‘qligini tekshirish talab qilinmaydi. To‘g‘ri, butun Rossiya aholisini emlashning iloji yo‘q... Ammo agar bunday imkoniyat mavjud bo‘lsa, yomon bo‘lmasdi. Agar iloji yo‘q bo‘lsa, shart emas”, — dedi Agafonov.

Uning qo‘shimcha qilishicha, agar antitana borligi tasdiqlansa, emlash shart emas. “Buni faqat sizning xohishingiz va shifokoringizning tavsiyasi hal qiladi”, — deya ta’kidladi Agafonov.

Rossiyada koronavirusga qarshi keng ko‘lamli emlash ishlarini boshlash haqida prezident Vladimir Putin dekabr boshida buyruq bergan, birinchi navbatda xavf guruhidagi fuqarolar emlanishi kerakligini aytgan edi. Keyinchalik  mamlakatning barcha hududlari vaksinani qabul qilishga tayyorligi, yetkazib berish, saqlash va emlash sifati parametrlari hamda bemorlar va tibbiy xodimlar uchun eslatmalar ishlab chiqilgani ma’lum qilingandi.