Buyuk Britaniyaning Milliy kosmik kengashi 2021-yil mobaynida birinchi milliy kosmik strategiyani ishlab chiqadi, strategiya, xususan, kosmik qo‘mondonlikni ta’sis etish va mamlakatdan sun’iy yo‘ldoshlarni uchirish imkoniyatlarini rivojlantirishni nazarda tutadi. Bu haqda Buyuk Britaniya mudofaa va tashqi siyosatining umumiy sharhida ma’lum qilindi, deb yozadi “Interfaks”.

Ta’kidlanishicha, 2021-yilga mo‘ljallangan milliy kosmik strategiya “harbiy va fuqarolik kosmik siyosatiga kompleks yondashuvni” mustahkamlaydi. Uning bir qismi sifatida 2021-yilning yoziga qadar “Buyuk Britaniya qurolli kuchlari mamlakat manfaatlarini ham Yerda, ham koinotda ilgari surishi uchun ilg‘or imkoniyatlarga ega bo‘lishi uchun” yangi kosmik qo‘mondonlikni tashkil etish rejalashtirilmoqda.

2022-yilga qadar Buyuk Britaniya hududidan —  Shotlandiyadan sun’iy yo‘ldosh uchirish imkoniyatlarini rivojlantirish rejalashtirilgan. “Bu bizga Buyuk Britaniya koinotga nimani va qachon yuborishi to‘g‘risida yanada strategik muxtoriyat va moslashuvchanlikni beradi”, — deya ta’kidlanadi sharhda.

Shuningdek, mamlakat mudofaasi va siyosatining umumiy sharhiga ko‘ra, Britaniya yadro salohiyatini 40 foizga oshirmoqchi. Gap o‘ttiz yil davom etgan bosqichma-bosqich qurolsizlanish tugaganini ko‘rsatuvchi “Traydent” yadroviy jangovar kallaklar sonini 180 tadan 260 taga yetkazish rejalari haqida bormoqda.

Ta’kidlanishicha, ushbu strategiya xavfsizlik muhitidagi o‘zgarishlar va keng ko‘lamli texnologik va aqidaparastlik tahdidlarning mavjudligi natijasidir. Ayni paytda, faollar ogohlantirishicha, Buyuk Britaniya COVID-19 pandemiyasi bilan kurashish uchun mablag‘ga muhtoj bir paytida yangi qurollanish poygasini boshlash bilan o‘zini xavf ostiga qo‘ymoqda.

Avvalroq Fransiya birinchi marta koinotda harbiy mashg‘ulotlar o‘tkaza boshlagani haqida xabar berilgandi. O‘quv mashg‘ulotlar 1965-yilda uchirilgan birinchi fransuz sun’iy yo‘ldoshiga bag‘ishlanib, AsterX deb nomlandi. Mashg‘ulotlar paytida harbiylar o‘ta xavfli kosmik obyekt va Fransiya sun’iy yo‘ldoshiga nisbatan tahdidlarni kuzatib borishi aytilgan.