AQShda 2020-yilgi prezident saylovlari chog‘ida Rossiya hukumati Demokratik partiya nomzodi Jo Baydenni “badnom qilish” kampaniyasini uyushtirgan. Bu haqda AQSh Milliy razvedkasi direktori boshqarmasi hisobotida ma’lum qilindi, deb yozadi Meduza.
Razvedka ma’lumotlariga ko‘ra, Rossiya rahbariyati saylov jarayoniga jamoatchilik ishonchini pasaytirish, Donald Trampni qo‘llab-quvvatlash va Qo‘shma Shtatlardagi ijtimoiy-siyosiy kelishmovchiliklarni kuchaytirishga qaratilgan “ta’sir operatsiyalarini” o‘tkazgan. Hisobot mualliflarining fikriga ko‘ra, ushbu harakatlarga Rossiya prezidenti Vladimir Putin ruxsat bergan.
Shu bilan birga, hisobotda razvedka xizmatining Rossiya tomonidan saylovlar infratuzilmasiga nisbatan hech qanday kiberhujumlar qayd etmagani ta’kidlangan.
Razvedka ma’lumotlariga ko‘ra, boshqa mamlakatlar ham saylovlarga aralashgan, xususan, Eron, Kuba, Venesuela, ammo ularning ta’siri minimal darajada bo‘lgan. Razvedka saylovlarga Xitoyning aralashuvidan asar ham topmadi: hisobot mualliflarining fikriga ko‘ra, Pekin saylovga aralashuv aniqlangan taqdirda salbiy oqibatlar kelib chiqishi tufayli bunday harakatlardan voz kechishga qaror qilgan.
Ma’lumot uchun fevral oyi oxirida AQSh Rossiyaga qarshi bir necha hafta ichida sanksiyalar joriy qilishi mumkinligini aytdi. Oq uy ekspertlar boshqa masalalar qatori, Moskvaning saylovlarga aralashuvini o‘rganayotganini ta’kidladi, agar bu tasdiqlansa, yangi cheklovlar uchun sabablardan biri topiladi.
AQSh razvedkasi rahbari Jon Retkliff 2020-yilning oktabr oyida Rossiya va Eronning mamlakatdagi prezidentlik saylovlariga aralashishga urinayotganini e’lon qilgan edi. Moskvada bu ayblovlar “mutlaqo asossiz” deb atalgan.
Avvalroq AQSh FQB prezident sayloviga aralashishda ayblanayotgan rossiyalik haqidagi ma’lumot uchun 250 ming dollar mukofot va’da qilgan edi.
Izoh (0)