АҚШда қонида коронавирусдан ҳимояловчи антитана мавжуд бўлган чақалоқ дунёга келди. Бу ҳақда Tengrinews хабар берди.
Флорида штатининг Бока-Ратон шаҳри педиатрлари Пол Гильберт ва Чед Рудникнинг айтишича, боланинг онаси, тиббиёт ходими бўлган аёл январь ойида ҳомиладорликнинг 36-ҳафтасида Moderna вакцинаси билан эмланган. Уч ҳафта ўтиб эса аёл тетик ва соғлом қизалоқни дунёга келтирди.
Тадқиқотчилар қизча туғилгандан сўнг дарҳол киндик ичакчасидан қон олиб таҳлил қилди ва унда фақатгина онадан ўтиши мумкин бўлган антитаналар борлигини аниқлади.
Мутахассисларнинг тасдиқлашича, болада антитана фақат вакцинация натижасида ҳосил бўлган, чунки туғруққача онанинг коронавирусга топширган тести салбий натижа берган, яъни антитаналар унинг қонида табиий равишда ривожланган бўлиши мумкин эмас.
«Бизга маълум бўлишича, бу эмлашдан кейин боланинг антитаналар билан туғилиши бўйича дунёдаги биринчи ҳолат. Шундай экан, онани эмлаш орқали SARS-CoV-2 инфекциясидан ҳимояланиш ва унинг хавфини камайтириш учун потенциал бор. Ушбу ҳолат келгуси бир неча ой ичида эмланган оналардан минглаб шундай болалар туғилишига олиб келади», — деди доктор Гильберт.
Шифокорлар уларнинг кашфиёти кейинги изланишларга ва ушбу ҳимоя қанча давом этишини аниқлашга туртки бўлади, деб умид билдирди.
2020 йилнинг ноябрь ойида Сингапурда SARS-CoV-2 коронавирусига қарши антитанага эга чақалоқ туғилгани ҳақида хабар берилган эди. Сингапурда ўтказилган тадқиқот натижасига кўра, ҳомиладорлик пайтида COVID-19’га чалинган аёлларда касаллик бошқалардаги ўртача кўрсаткичдан оғирроқ ўтмайди, уларнинг фарзандлари эса коронавирусга қарши антитана билан туғилади.
Аввалроқ Австриядаги Инсбрук тиббиёт университети олимлари коронавирусга чалиниб чиққанларда касалликка қарши иммунитет камида саккиз ой давомида сақланиб қолишини аниқлаган эди.
Шунингдек, АҚШ ҳукумати коронавирусига қарши кураш доирасида Американинг Эли Лиллй фармацевтика компанияси томонидан ишлаб чиқарилган антитана коктейлидан фавқулодда фойдаланиш учун рухсатномани тасдиқлади.
Изоҳ (0)