Twitter o‘z tarkibidan taqiqlangan kontentlarni olib tashlamasa, bir oy ichida tarmoq Rossiyada sud qarorisiz ham bloklanishi mumkin. Rossiya OAVni nazorat qiluvchi federal xizmati (“Roskomnadzor”) Twitter’dan keyin boshqa yirik ijtimoiy tarmoqlarning tezligini ham pasaytirishni istisno etmayapti. Bu haqda muassasa boshlig‘ining o‘rinbosari Vadim Subbotinga tayanib, Meduza xabar berdi.
Subbotinning aytishicha, hozircha “Roskomnadzor” “taqiqlangan kontentlarni olib tashlash bo‘yicha Twitter tomonidan aniq qadamlarni qayd etmayapti” va “muassasa xodimlarida muzokaralar olib borishga haliyam vaqt bor”.
“Boshqa saytlar ham Rossiya qonunlarini buzsa va ‘Roskomnadzor’ talabini bajarmasa, biz ularga nisbatan texnik choralar (tezligini pasaytirish, keyin bloklash) ko‘rishni istisno qilmaymiz”, — dedi Subbotin.
Rasmiyning so‘zlariga ko‘ra, hozirda Facebook, YouTube va Instagram singari yirik ijtimoiy tarmoqlar va xizmatlarga qarshi taqiqlangan ma’lumotlarni o‘chirmaslik bilan bog‘liq ma’muriy ishlar olib borilmoqda.
“Ma’muriy bayonnomalar tuzib qo‘yilgan bo‘lib, birinchi qatorda, jarima solish, ikkinchi qatorda — texnik choralar, ya’ni hozirda Twitter misolida ko‘rib turganingizdek, tarmoqlarni Rossiya qonunlariga rioya qilishga majburlashga qaratilgan trafik tezligini pasaytirish choralari turibdi. Bu parallel jarayonlardir”, — dedi Subbotin.
Eslatib o‘tamiz, “Roskomnadzor” 10-mart kuni ertalab Rossiyada Twitter tezligining pasayishi boshlanganini e’lon qildi. Muassasa o‘z harakatlarini 2017-yildan beri ijtimoiy tarmoqning noqonuniy ma’lumotlarni o‘z ichiga olgan uch mingdan ortiq xabarni o‘chirmagani bilan oqladi.
Ushbu xabarlarning fonida Rossiyada ko‘plab davlat internet resurslari, shu jumladan, Kreml, hukumat, Davlat dumasi, Federatsiya kengashi va “Roskomnadzor”ning veb-saytlari ishlamay qoldi. “Roskomnadzor”ning ta’kidlashicha, bunga rasmiy sabab “Rostelekom”dagi nosozliklar bo‘lib, Twitter’ning sekinlashuvini unga hech qanday aloqasi yo‘q.
Avvalroq TikTok o‘z joniga qasd qilishni targ‘ib qiluvchi videoroliklarni bloklayotganini ma’lum qilgan edi. 2-mart kuni Rossiyaning bir qator shaharlarida, shu jumladan, Moskvada maktab ma’muriyati ota-onalarga ijtimoiy tarmoqlarda o‘spirinlarning o‘z joniga qasd qilishiga chaqiruvchi videoroliklar paydo bo‘layotgani to‘g‘risida ogohlantiruvchi xabarlar yuborgan. “Roskomnadzor” tomonidan TikTok’da bunday videoroliklarning tarqalgani tasdiqlandi va kuzatuvchi organlarning aralashuvidan so‘ng ijtimoiy tarmoq ushbu kontentlarni tarmoqdan olib tashlagan
Izoh (0)