Yaponiyada pivo ishlab chiqarish bilan shug‘ullanuvchi Asahi Breweries kompaniyasi pivo uchun iste’mol qilsa bo‘ladigan stakanlarni yaratdi, deb xabar beradi “Korrespondent.net”.
Mog Cup nomini olgan idishlar iste’mol qilishga yaroqli materiallarni tayyorlashga ixtisoslashgan Marushige Confectionery kompaniyasi bilan hamkorlikda ishlab chiqarilmoqda.
U kartoshka kraxmalini yuqori harorat va bosim ostida pishirish orqali tayyorlanmoqda. Ishlab chiqaruvchining ta’kidlashicha, stakanlar suyuqlikni xona haroratida bir soatgacha ushlab tura oladi. Hozirda bu kabi idishlarning uch o‘lchamdagisi — S, M va L sotuvga chiqqan, shuningdek, ularning bir necha xil ta’mi ham bor.
“Shokolad yoki mayda qisqichbaqalar ta’miga ega guruchli kreker mazasini beruvchi stakanlarni xarid qilish mumkin”, — deyiladi xabarda.
Hozirda stakanlarning 10 donadan iborat jamlanmasi internet do‘kon orqali sotilmoqda. Eng kichik o‘lchamdagi Mog Cup narxi 10,6 dollarni tashkil etadi.
Avvalroq Londonda yesa bo‘ladigan lapsha qadog‘i yaratilgan edi, u ustiga suv quyilganida sousga aylanadi.
Izoh (0)