Taniqli tahlilchi Min-Chi Kuo Apple kompaniyasi yaratish ustida ish olib borayotgan yangi mahsulot haqida ma’lumot berdi — gap uzoq kelajakdagi texnologiya haqida ketmoqda. Uning so‘zlariga ko‘ra, 2030-yillarga borib kompaniya atrof-muhit bilan qo‘shimcha reallikda aloqa o‘rnatishga qodir “aqlli” linzalarni yaratadi, deb yozadi Hi-Tech.Mail.ru.
Tahlilchining ta’kidlashicha, yaqin o‘n yil ichida raqamli kontakt linzalar mustaqil qurilma sifatida ishlay olmaydi. Shu sababli ular smartfon bilan sinxronlashadi, u orqali barcha hisoblash ishlari amalga oshiriladi, linzaning o‘zi esa ekran sifatida ishlaydi.
Bu kabi kontakt linzalar qo‘shimcha va virtual reallikka ega zamonaviy texnologik shlemlar hamda ko‘zoynaklarning mantiqiy davomchisiga aylanadi. Hozircha u insonlarning kundalik hayotida qanchalik foyda berishi noma’lum, biroq u professionallarga: muhandislar, dizaynerlar, loyihalovchilar va boshqa mutaxassislarga yordam berishi aniq. Qo‘shimcha reallik yordamida inson ko‘ziga virtual obyektlarning real tasvirini uzatish mumkin — masalan, yangi interyerdagi mebellar joylashuvini o‘lchab ko‘rish yoki xonaning o‘zida keng hajmli modelni chizish.
Min-Chi Kuoning ma’lum qilishicha, Apple qo‘shimcha reallikka ega o‘zining birinchi shlemini 2022-yilda taqdim etadi, 2025-yilda esa ushbu texnologiyani oddiy ko‘zoynaklarga joylashtiradi. 2030-yillarga borib esa kichkina ekranlar kontakt linzalarda paydo bo‘lishi mumkin.
Avvalroq shveysariyalik olimlar ko‘zi ojizlarning ko‘rishiga yordam beradigan ko‘z to‘rpardasi implantini yaratgani to‘g‘risida xabar berilgandi.
Izoh (0)