Twitter’da Libneko niki ostidagi foydalanuvchi provayder qurilmadagi ijtimoiy tarmoq ishini sekinlashtirayotganini aniqlaydigan servisni yaratdi, deb xabar beradi Esquire.
Sayt Twitter foydalanadigan “Abs.twimg.com” domenidan suratni yuklab oladi va uning yuklanish tezligini o‘lchaydi. Ta’kidlanishicha, bu kabi tekshiruv bir daqiqaga yaqin vaqt oladi. Servis olingan ma’lumotni ushbu suratning boshqa servislardagi yuklanish tezligi bilan taqqoslaydi.
Servis keyinchalik o‘tkaziladigan tahlillar uchun foydalanuvchilarning anonim ma’lumotlarini to‘playdi, masalan, IP manzili yoki ulanish tezligi.
Eslatib o‘tamiz, 10-mart kuni “Roskomnadzor” kutilmaganda Rossiya hududi bo‘ylab Twitter’ning ishlashini barcha mobil qurilmalar va kompyuterlarning yarmida sekinlashtirishini ma’lum qilgandi. Idora shu orqali Twitter’ni Rossiya qonunchiligiga bo‘ysunishga majbur etib, rossiyaliklarning “noxolis kontent ta’siridan” himoya qilmoqchi.
“Roskomnadzor”ning ma’lum qilishicha, agarda ijtimoiy tarmoq Rossiya qonunchiligi talablarini e’tibordan chetda qoldiraversa, uni bloklash uchun yangi choralar qo‘llaniladi.
Avvalroq TikTok o‘z joniga qasd qilishni targ‘ib qiluvchi videoroliklarni bloklayotganini ma’lum qilgan edi. 2-mart kuni Rossiyaning bir qator shaharlarida, shu jumladan, Moskvada maktab ma’muriyati ota-onalarga ijtimoiy tarmoqlarda o‘spirinlarning o‘z joniga qasd qilishiga chaqiruvchi videoroliklar paydo bo‘layotgani to‘g‘risida ogohlantiruvchi xabarlar yuborgan. “Roskomnadzor” tomonidan TikTok’da bunday videoroliklarning tarqalgani tasdiqlandi va kuzatuvchi organlarning aralashuvidan so‘ng ijtimoiy tarmoq ushbu kontentlarni tarmoqdan olib tashlagan.
Izoh (0)