Samarqandda IIB tergovchilari boshlig‘iga 1000 dollar pora taklif qilgan fuqaro qo‘lga olindi

Samarqand viloyatining Paxtachi tumani IIB huzuridagi Tergov bo‘limi boshlig‘iga 1000 dollar pora taklif qilgan shaxsga nisbatan jinoyat ishi qo‘zg‘atildi. Bu haqda “Daryo”ga viloyat IIB axborot xizmati ma’lum qildi.

Ta’kidlanishicha, 2021-yilning 9-mart kuni Paxtachi tumani “Mirzo Ulug‘bek” mahallasida yashovchi, 1979-yilda tug‘ilgan fuqaro A.A.ning yashash xonadoni va yordamchi xo‘jaliklarida o‘tkazilgan tintuv davomida xonadondan 4,47 gramm marixuana giyohvandlik moddasi aniqlangan. Holat tegishli tartibda rasmiylashtirilib, Paxtachi tuman IIB huzuridagi Tergov bo‘limi tomonidan Jinoyat kodeksining 276-moddasi 1-qismi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay, qonunga xilof ravishda tayyorlash, egallash, saqlash va boshqa harakatlar) bilan jinoyat ishi qo‘zg‘atilib, tergov harakatlari olib borishga kirishilgan.

Tuman IIB huzuridagi Tergov bo‘limi tomonidan A.A. bilan bog‘liq tergov harakatlari o‘tkazish uchun chaqirtirilganida u ishini pul evaziga ijobiy hal qilib berishni so‘rab, IIB xodimiga 1000 dollar miqdoridagi pullarni pora tariqasida taklif qilgan. Xodim unga pora berish jinoyat ekanligini bir necha marotaba tushuntirishiga qaramay, A.A. keyinroq kelib, unga uchrashishini aytgan.

IIB xodimining bildirgisiga asosan, O‘zbekiston Respublikasi IIV O‘XB Samarqand viloyati bo‘yicha bo‘limi xodimlari va Paxtachi tumani prokuraturasi tomonidan tezkor tadbir o‘tkazilib, fuqaro A.A. IIB xodimiga 1000 dollarni pora tariqasida bergan vaqtida tezkor tadbir ishtirokchilari tomonidan ushlanib, hujjatlashtirib olingan.

Mazkur holat yuzasidan Jinoyat kodeksining 211-moddasi (pora berish) 1-qismi bilan jinoyat ishi qo‘zg‘atilib, tergov harakatlari olib borilmoqda.