Tanzila Norboyeva: “Ayol hokimlarning faoliyatini ‘a’lo’ deyishga hali vaqt bor”

O‘zbekistonning 6 ta tumanida rahbarlik qilib kelayotgan ayol hokimlarning faoliyatiga “a’lo” baho qo‘yishga hali erta. Bu haqda Senat raisi Tanzila Norboyeva Respublika xotin-qizlar jamoatchilik kengashining 15-mart, dushanba kuni o‘tkazilgan birinchi yig‘ilishidan so‘ng OAV vakillariga bergan intervyusida ta’kidlab o‘tdi, deya xabar bermoqda “Daryo” muxbiri Mirolim Isajonov.

“Ayol hokimlarning faoliyatiga ‘yaxshi’ baho qo‘yaman. ‘A’lo’ deyishga hali vaqt bor. Qachonki, bugun yig‘ilishda muhokama qilingan muammolar, turli noroziliklar butunlay bartaraf etilsagina, so‘ng biz ‘a’lo’, deb baho qo‘yishimiz mumkin.

Lekin ularning bugungi harakatiga bemalol ‘yaxshi’, deya baho bera olamiz. Sababi, xabaringiz bor, tumanlarimiz hozirda ijtimoiy va iqtisodiy kelib chiqishidan ‘qizil’, ‘sariq’ hamda ‘yashil’ kabi reytinglarga bo‘lingan. Ahvoli juda yomon bo‘lgan tumanlar ‘qizil’, o‘rtachasi ‘sariq’ va rivojlangan tuman ‘yashil’ deb baholanmoqda. Bizning ayollar shahar va tumanlarni qabul qilayotganida ularning ko‘pi ‘qizil’ hudud edi. Ayol hokimlar o‘z sa’y-harakati bilan tumanlarini ‘yashil’ hududga olib chiqishga muvaffaq bo‘lishdi.

Biroq ular odamlarimizning muammolarini to‘liq hal qilib, tumanini qattiq rivojlantirib yuborganidan keyin ‘a’lo’ baho qo‘yamiz. Ayol hokimlar ‘a’lo’ga olib chiqishiga men ishonaman, bu ularning qo‘lidan keladi”, — dedi Norboyeva.