Самарқандда ИИБ терговчилари бошлиғига 1000 доллар пора таклиф қилган фуқаро қўлга олинди

Самарқанд вилоятининг Пахтачи тумани ИИБ ҳузуридаги Тергов бўлими бошлиғига 1000 доллар пора таклиф қилган шахсга нисбатан жиноят иши қўзғатилди. Бу ҳақда «Дарё»га вилоят ИИБ ахборот хизмати маълум қилди.

Таъкидланишича, 2021 йилнинг 9 март куни Пахтачи тумани «Мирзо Улуғбек» маҳалласида яшовчи, 1979 йилда туғилган фуқаро А.А.нинг яшаш хонадони ва ёрдамчи хўжаликларида ўтказилган тинтув давомида хонадондан 4,47 грамм марихуана гиёҳвандлик моддаси аниқланган. Ҳолат тегишли тартибда расмийлаштирилиб, Пахтачи туман ИИБ ҳузуридаги Тергов бўлими томонидан Жиноят кодексининг 276-моддаси 1-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай, қонунга хилоф равишда тайёрлаш, эгаллаш, сақлаш ва бошқа ҳаракатлар) билан жиноят иши қўзғатилиб, тергов ҳаракатлари олиб боришга киришилган.

Туман ИИБ ҳузуридаги Тергов бўлими томонидан А.А. билан боғлиқ тергов ҳаракатлари ўтказиш учун чақиртирилганида у ишини пул эвазига ижобий ҳал қилиб беришни сўраб, ИИБ ходимига 1000 доллар миқдоридаги пулларни пора тариқасида таклиф қилган. Ходим унга пора бериш жиноят эканлигини бир неча маротаба тушунтиришига қарамай, А.А. кейинроқ келиб, унга учрашишини айтган.

ИИБ ходимининг билдиргисига асосан, Ўзбекистон Республикаси ИИВ ЎХБ Самарқанд вилояти бўйича бўлими ходимлари ва Пахтачи тумани прокуратураси томонидан тезкор тадбир ўтказилиб, фуқаро А.А. ИИБ ходимига 1000 долларни пора тариқасида берган вақтида тезкор тадбир иштирокчилари томонидан ушланиб, ҳужжатлаштириб олинган.

Мазкур ҳолат юзасидан Жиноят кодексининг 211-моддаси (пора бериш) 1-қисми билан жиноят иши қўзғатилиб, тергов ҳаракатлари олиб борилмоқда.