Buxoro viloyatida Fuqarolik ishlari bo‘yicha Kogon tumanlararo sudi qarori bilan 100 oy, ya’ni 9 yil davomida farzandining moddiy ta’minotidan bo‘yin tovlab yurgan fuqaro 15 sutkaga qamaldi. Bu haqda “Daryo”ga MIBning Kogon shahar bo‘limi boshlig‘i Shamshod Mirzayev xabar berdi.
Ta’kidlanishicha, qarzdor M.X. 2012-yilning oktabr oyidan 2021-yilning 1-martiga qadar 100 oy uchun 32 million 728 ming so‘m aliment to‘lovlarini to‘lashdan qasddan bo‘yin tovlab kelgan.
Fuqarolik ishlari bo‘yicha Kogon tumanlararo sudining 2012-yil 23-oktabrdagi qaroriga ko‘ra, u turmush o‘rtog‘i N.Q. foydasiga ikki nafar voyaga yetmagan farzandining moddiy ta’minoti uchun har oylik ish haqi va boshqa daromadlarining uchdan bir qismidan kam bo‘lmagan miqdorda aliment to‘lashi lozimligi belgilangan.
MIB Kogon shahar bo‘limi tomonidan fuqaro M.X. bir necha marotaba o‘z vaqtida farzandlari moddiy ta’minotini bajarishi yuzasidan ogohlantirilgan. Biroq M.X. turli bahona-vajlar bilan aliment to‘lamasdan, yashirinib yurgan. Qidiruv tadbirlari natijasida ushlangan otaga nisbatan ma’muriy bayonnoma rasmiylashtirilgan.
Kogon shahar sudining ochiq sud majlisida huquqbuzarning g‘ayriqonuniy harakatlari MIB Kogon shahar bo‘limi tomonidan Ma’muriy javobgarlik to‘g‘risidagi kodeks bilan bilan malakalangan. Va otaga nisbatan 15 sutka ma’muriy qamoq jazosi tayinlangan.
“Fuqaro M.X.ning o‘n besh sutka ma’muriy qamoqqa olingani uning kelgusida alimentdan kelib chiqqan qarzdorligini to‘lashdan ozod qilmaydi”, — dedi Shamshod Mirzayev.
Izoh (0)