Qashqadaryo viloyatining Chiroqchi tumanida 43 yoshli ayol kuyish alomatlari bilan o‘lik holda topildi. Bu haqda “Daryo”ga xabar bergan marhumaning yaqinlariga ko‘ra, ayol o‘ldirilib, keyin yoqib yuborilgan.
“Bunday shubhaga borishimizning sababi oddiy. Qaynsinglim yonib ketishi oqibatida o‘lgan bo‘lsa, nega sochlari umuman yonmagan? Qolaversa, oyoq kiyimlari ham butun turibdi. Hatto olov ham o‘tmagan. Odatda odam yongach baqirib har tomonga chopadi-ku. Rahmatli, xuddi tandirda kuygandek jizg‘anak bo‘lib turibdi. O‘ladigan darajada yonmagan. Yuzi tanib bo‘ladigan darajada shunchaki kuygan”, — deydi marhumaning kelinoyisi Gulnora Normo‘minova.
Gulnora Normo‘minovaning aytishicha, noxush xabarni eshitgach voqea joyiga tezda yetib borgan.
“Qaynsinglimning qaynanasi Xosiyat momodan ‘Nega bunday bo‘ldi, janjal bo‘lganmidi?’, deb so‘radim. Xosiyat momo ‘Yo‘q, janjal bo‘lgani yo‘q. Kechki payt eri kelgandi, manti suzib berdi. Shunda eri bunga qornim to‘ymadi. Go‘sht qovurib bersin, degandi. Keyin qizi go‘sht qovurish uchun tashqariga chiqqandi, shunda qo‘rada (molxona) olov yonayotganini ko‘rgan. Hammamiz yugurib chiqdik. Chiqqanimizda kelinim yonayotgan ekan. Shu payt momojon, dedi-yu, o‘zini tashlab yubordi, dedi”, — deydi Gulnora Normo‘minova.
“Voqea haqida eshitdim-u, tezda yetib bordim. Borsam, bolam bechora yerda yotgan ekan. Ushlab ko‘rsam, yaxlab, qotib qolgan. Yongan odamning issiq tafti bo‘lmaydimi? Birdan qotib qolmaydi-ku. Qolaversa, yongan odam jon holatida qochmaydimi? Mening bolam yonib, o‘sha joyning o‘zida o‘lib qoladimi? Aslida, ular qizimni o‘zlari o‘ldirib qo‘yib, keyin yoqib yuborgan”, — deydi Musallam momo Hojimurodova.
Musallam momoning aytishicha, qizining jasadi shunchaki kuygan.
“Qizimning o‘lganiga ishonmay, qayta-qayta ushlab ko‘rdim. Shunchaki kuygan. O‘lib qoladigan darajada yonmagan. Eng yomoni, mening qizim o‘lib ketdi. Uni o‘ldirganlar esa yuribdi”, — deydi marhumaning onasi.
Marhumaning akasi Husanmurod Yusupovning aytishicha, singlisi va kuyovi hech qachon yaxshi yashamagan. Kuyovi har doim singlisini haqoratlab, kamsitib kelgan. Ular esa singlisining oilasi tinchligini o‘ylab, bunga ko‘z yumib yashagan.
“Voqeani eshitishim bilan tezda yetib bordim. Borsam, singlim o‘lib yotgan ekan. Qaynonasiga qarab, ‘axiri yedingmi’, dedim. Ular esa qochib uyiga kirib ketdi”, — deydi marhumaning akasi.
Marhumaning aka-ukasi Husanmurod hamda Muzaffar Yusupovlarning aytishicha, mazkur ishni o‘rganayotgan tuman prokuraturasi adolatli ish olib bormayapti.
“Biz viloyat prokuraturasiga shikoyat qilib, ishni tuman ko‘rmasligini so‘rayapmiz. Boisi Ilhom ismli tergovchi mazkur ishga judayam e’tiborsiz yondashyapti. Uning oldiga borib, ish qachon sudga oshadi, desam, hali bizning uch oy vaqtimiz bor, dedi. Tergovchi ishni shu darajada sekin va bamaylixotir olib boryaptiki, hatto prokuraturaga kelgan ekspertiza xulosasini ham o‘qib ko‘rmagan ekan. Qachon o‘qiysiz va bizga xabar berasiz, deb so‘rasam, bizning vaqtimiz bemalol, dedi”, — deydi Husanmurod Yusupov.
Marhumaning yaqinlari, shuningdek, mazkur jinoyat ishini tergov qilayotgan tergovchi marhumaning qaynog‘asi — kuyovning akasi bilan birga yurganini ko‘rganini, shu sabab tergov shaffof o‘tishiga gumon qilayotganini aytmoqda.
“Tergovchi biz shubha qilayotgan odamlar bilan birga yuribdi. Shunday bo‘lgach, biz tergovchining adolatli ish olib borishiga qanday ishonamiz”, — deydi marhumaning jiyani Jahongir Chorshanbiyev.
Marhumaning yaqinlari voqea ro‘y bergan kuni qishloqqa Buxoro viloyatidan mehmon kelganini, u singlisi va kuyovi tortishib qolganini eshitganini, singlisining yordam so‘rab baqirganiga ham guvoh bo‘lganini aytganini ta’kidlamoqda.
“O‘sha kuni qishlog‘imizga kelgan mehmon ertasi kuni tanishlariga bir ayolning baqirgan ovozi eshitilganini, eri bilan tortishayotganini taxmin qilganini va singlimning yordam so‘rab chaqirganini eshitganini aytgan. Buni bilish maqsadida o‘sha mehmonning o‘ziga ham telefon qilib so‘radim. Shu gaplarni tasdiqladi”, — deydi marhumaning akasi Muzaffar Yusupov.
Mazkur voqea xususida Qashqadaryo viloyat prokuraturasidan axborot so‘raganimizda prokuratura axborot xizmati rahbari Jasur Shukurov tahririyat tomonidan yozma murojaat taqdim qilinishi lozimligini, yo‘qsa og‘zaki so‘rovga javoban axborot berilmasligini bildirdi. Shukurov bu talab Bosh prokuratura tomonidan aytilganini qo‘shimcha qildi.
So‘ngra mazkur vaziyatga oydinlik kiritish maqsadida Bosh prokuratura axborot xizmati rahbari Hayot Shamsutdinov bilan bog‘landik. Bosh prokuratura axborot xizmati rahbarining ta’kidlashicha, tahririyat so‘rovi yozma bo‘lishi mumkinligi haqida hech qanday talab qo‘yilmagan.
“Daryo” muxbirining og‘zaki so‘roviga javoban Hayot Shamsutdinov tomonidan taqdim etilgan ma’lumotga ko‘ra, 2021-yilning 16-yanvar kuni soat 19:00 da Chiroqchi tumanining Oqto‘nli qishlog‘ida yashagan N.Yu. noma’lum sabab bilan molxonasining kirish eshigi oldida ustiga solyarka sepib, o‘zini yoqib yuborgan va butun tana a’zolarining kuyish jarohati bilan voqea joyida vafot etgan.
43 yoshli N.Yu.ning o‘z joniga qasd qilib vafot etganligi holati bo‘yicha Chiroqchi tumani prokuraturasi tomonidan Jinoyat kodeksining 103-moddasi 1-qismi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilgan. Marhuma N.Yu.ning o‘limi yuzasidan sudga oid tibbiyot ekspertizasi, shuningdek, uning ruhiy holatini aniqlash uchun sud psixologiya ekspertizasi tayinlangan.
Bosh prokuraturaning qo‘shimcha qilishicha, jinoyat ishi bo‘yicha Chiroqchi tumani IIB hamda tuman mahalla va oilani qo‘llab-quvvatlash bo‘limi mas’ul xodimlarining harakatlari yuzasidan xizmat tekshiruvlari tayinlangan. Hozirda tergov harakatlari Chiroqchi tumani prokuraturasi tomonidan olib borilmoqda.
Izoh (0)