Ijtimoiy tarmoqlarda 8-mart kuni Toshkentning Do‘mbirobod dahasidagi chorrahalarning birida yuzaga kelgan tirbandlikni bartaraf qilgan bolakay aks etgan video tarqaldi. Unda 11 yoshli bola chorraha o‘rtasida transportlarning harakatini maxsus tayoqcha – jezl yordamida tartibga solayotganini ko‘rish mumkin.
Ushbu voqeadan so‘ng Ichki ishlar vazirligi Yo‘l harakati xavfsizligi bosh boshqarmasi chorrahani tartibga solgan bolani suhbatga chaqirdi.
Bolaning ismi Javlonbek Turg‘unov bo‘lib, u 232-maktabning 5-sinfida o‘qiydi. Javlonbekning ta’kidlashicha, u avvaldan ichki ishlar xodimi bo‘lishga, ularning kiyimlari va tirbandliklarni bartaraf etishga qiziqqan.
Javlonbek o‘sha kungi bo‘lgan voqeani quyidagicha so‘zlab berdi:
“8-mart kuni edi. Do‘stim bilan do‘konga chiqqan edik. Shunda chorrahada tirbandlik yuzaga kelgan ekan. Tirbandliklarni bartaraf etishga qiziqqanim bois yo‘lni tartibga keltirishni boshladim. Jezlni qassobxonadagilar berdi. Ular esa mashinalar to‘xtash joyida ishlovchi xodimdan olishgandi”, – deydi u.
Javlonbekning aytishicha, u YPX xodimining chorrahada qo‘llaydigan harakatlarini boshlang‘ich sinfdagi Yo‘l harakati xavfsizligi darsida o‘rgangan. Dars vaqtida ichki ishlar xodimlari maktabga kelib, ularga amaliy mashg‘ulotlar ham o‘tgan.
Bundan avval IIV YHXBB internetda Qashqadaryoda YPX avtomobili yonib ketgani to‘g‘risidagi xabarlarga oydinlik kiritgani, instabloger Doniyor Qayumovning Malibu’si ruxsatsiz “tonirovka” qilingani uchun jarima maydonchasiga olib ketilgani hamda Sirdaryoda ichki ishlar xodimi kiyimida raqsga tushgan yigit 8 sutkaga qamalgani haqida xabar berilgandi.
Izoh (0)