Konteynerdan gapiramiz va ko‘rsatamiz. Namangan viloyati hokimining konteyner-uyi ancha “yuqumli” chiqib qoldi.
Buxoro viloyati hokimligi ham konteyner makon qurdi. “Ayni paytda mazkur vagon-shtab Olot tumani ‘Davlatboy’ mahallasiga joylashtirilgan. Botir Zaripov shu yerda yashab, olotliklarning muammolarini o‘rganmoqda. Ularni hal etish choralarini ko‘rmoqda”, — deb yozdi hokimlik matbuot xizmati.
“Onlayn qabullar bilan boshlab konteynerlargacha yetib keldik”, — deb yozdi “Davletov.uz” kanali.
26-fevral kuni davlat rahbari barcha viloyat hokimlari va prokurorlariga mahallalarda hech bo‘lmasa bir oy yashab, muammolarni “pastdan” o‘rganishni taklif qilgandi. Shundan keyin konteyner-uylarga o‘tish boshlanib ketdi. Nafaqat, hokimlar, balki konteyner oddiy fuqarolarga uy sifatida ham berilyapti. Buxoroda “Remont mexanika” zavodi bilan hamkorlikda ishchi guruhi tuzilib, hozirgi kunga qadar respublikaning turli hududlaridan ming donaga yaqin konteyner yig‘ilmoqda. Ular zamonaviy ko‘rinishda ta’mirlanib va jihozlanib, imtiyozli kredit asosida viloyatdagi ijtimoiy yordamga muhtoj oilalarga tarqatilmoqda.
Aslida konteynerdan uy qurish g‘oyasi yangi emas. Ko‘p yillar ilgari amerikalik me’mor Adam Kalkin konteynerdan bejirim uy yaratish g‘oyasini ommalashtirgan.
Nima uchun konteyner? Chunki u arzon, ixcham, ekologik va mobil yechim bo‘la oladi. Mamlakatimizda ko‘chib yuruvchi lagerga ehtiyojmand korxonalar ko‘p yillardan beri konteyner-yotoqxonalarda yashaydi. Shuningdek, yo‘l chetlaridagi do‘konlar bexos “buz-buz”lardan sug‘urtalanish uchun konteynerlardan qurilmoqda.
* * *
Toshkentda dahshatli fojia sodir bo‘ldi. Yunusoboddagi bir uyda besh nafar talabaning murdasi topildi. Ular Toshkent Axborot texnologiyalari universiteti hamda Singapur va Inha universiteti talabalari bo‘lgan. Tibbiy ekspertiza ular noma’lum moddadan zaharlanganini ma’lum qild. Prokuratura yong‘in xavfsizligi qoidalari buzilishi bilan bog‘liq jinoiy ish qo‘zg‘atdi.
Shu voqeadan keyin ijarada yashaydigan talabalarning sharoiti alohida o‘rganiladigan bo‘ldi. Oliy va o‘rta maxsus ta’lim vaziri Abduqodir Toshqulov ishchi guruhlar tuzilib mahallalarda talababay yurishlar qilinayotganligini bildirdi. Ijarada turuvchi talabalar ham qizil, sariq va yashil kategoriyalarga tasniflanadigan bo‘ldi. Bevaqt nobud bo‘lgan talabalarning oilasiga moddiy va ma’naviy yordam ko‘rsatilishi ta’kidlandi.
Bu fojia talabalarning yotoqxona bilan ta’minlanmaganligi muammosi yana bir ko‘tarilishiga turtki berdi. “Hisob-kitoblarga ko‘ra, bugungi kunda yotoqxonalarda yashashga ehtiyoji bo‘lgan talabalar soni 149 ming 400 nafarni tashkil etmoqda. Abituriyentlarga beshta ta’lim yo‘nalishini tanlashdek imkoniyatning berilishi talabalar turar joyiga bo‘lgan ehtiyojni oshirib yubordi. Hattoki, sirtqida o‘qiydigan talabalarga ham. Boshqa viloyatdagi OTMning sirtqi bo‘limiga o‘qishga kirgan talaba ham bir oy bo‘lsa-da, talabalar turar joyiga muhtoj bo‘lyapti. Chunki uning o‘sha joyda qarindoshi yo‘q, mehmonxonalar qimmat...”, deydi Abduqodir Toshqulov.
Agar birinchi va ikkinchi xabarimizni umulashtirsak, talabalarga konteynerlardan uy qurib muammoni hal etish mumkin.
“Troll.uz” kanali Dubayda to‘liq konteynerlardan qurilgan shaharcha videosini namoyish qildi.
* * *
Mahallabay, talababay... So‘nggi kunlarda “bay-bay”lab ishlash urfga kirmoqda. Prezident uy-joylar qurilishi xalqparvar komissiya tomonidan nazorat qilinishini aytish asnosida “Viloyat, tuman va shahar hokimlari bir hafta davomida yangi tizim asosida, aholini uy-joy bilan ta’minlashda yaratilayotgan sharoit va imkoniyatlarni odamlarga mahallabay tushuntiradi”, dedi. Shuningdek, Shavkat Mirziyoyev xalqaro xotin-qizlar kuni munosabati bilan so‘zlagan nutqida “Ayollar daftari” bo‘yicha “mahallabay”, “xonadonbay” ishlash usuli orqali har bir mahalla va xonadon kesimida ularning muammolarini ijobiy hal etilishi shartligini ta’kidladi.
Yunusoboddagi talabalar fojiasidan so‘ng vazir Abduqodir Toshqulov ishchi guruhlar tuzilib, endilikda mahallalarda talababay yurish boshlanganini ma’lum qilgandi. Xo‘sh, “bay” qo‘shimchasi qanday ma’no anglatadi? “O‘zbek tilining izohli lug‘ati”da yozilishicha, “bay” so‘zi arabchadan olinib, “savdolashish”, “sotish”, “kelishish” degan ma’nolarni bildiradi. “Ishbay”, “donabay” so‘zlari bajarilgan ish asosida yoki mahsulotning donasi asosida hisob-kitob qilinishini bildiradi. Demak, “mahallabay”, “talababay” degani har bir mahallani yoki talabani e’tiborga olib ishlash va ishni shu asosda baholash deganidir.
Ammo mahallabay ishlash yaqindagina boshlangani sababli hali mevasini ko‘rib ulgurmadik. Shu bilan birga, quyidagi arizani ko‘rgach, izohga hojat yo‘qligini tushunasiz. Bunday holatlar mamlakatimizda sanoqli emas.
* * *
O‘zbekiston Prezidenti 8-mart – Xalqaro xotin-qizlar kuni munosabati bilan jamiyat hayotida faol bo‘lgan bir guruh ayol-qizlarni mukofotladi. Mukofotlanganlar orasida davlat xizmatchisi, jurnalist, shifokor, aktrisa, otinoyi kabi turli kasb va soha egalari bor. “Mamlakatimizda aziz va mo‘tabar ayol zotini ulug‘lash, opa-singillarimizning davlat va jamiyat hayotida tutgan o‘rni va nufuzini oshirish, o‘zining ko‘p yillik samarali mehnati, boy amaliy tajribasi bilan oilalarda ma’naviy-axloqiy muhitni mustahkamlash, farzandlarimizni ona Vatanga muhabbat, milliy va umuminsoniy qadriyatlarga hurmat ruhida tarbiyalash ishlariga katta hissa qo‘shayotgan xotin-qizlarimizni munosib qadrlash maqsadida hamda yurtimizda olib borilayotgan tub islohotlarda faol qatnashib, yangi O‘zbekistonni barpo etish, xalqimiz farovonligini yuksaltirish yo‘lida tashabbus va ibrat ko‘rsatib kelayotgani uchun bir guruh ayollar faxriy unvon, orden va medallar bilan mukofotlansin” – deyiladi farmon matnida.
Mavzuga oid:
* * *
UzAuto Motors xodimlari oxiri ish tashlash e’lon qildi. Ijtimoiy tarmoqlarda 6-mart kuni UzAuto Motors AJga qarashli Transport tashuvlari boshqarmasining haydovchi xodimlari ish haqi va rahbariyatidan norozi bo‘lib, avtoturargoh oldida to‘plangani aks etgan video tarqaldi. Videoda avtomobil tashuvchi uzun yuk mashina haydovchilarining noroziligini ko‘rish mumkin.
“Bir oylik ish haqim 20 ming so‘m chiqibdi, ba’zilarga 450 so‘m ish haqi to‘langan. Avval ham shunaqa qilishgan edi. Haydovchilar oyligidan 800 ming so‘mdan ushlab qolingan. Bizni haqorat qilishmoqda. Kechasi bilan uxlamay ishlaganmiz, kerak bo‘lsa, kechasi bilan uxlatmay ishlatishyapti. Xorazmgacha mashina tashiganman”, – deydi xodimlardan biri.
Yana bir haydovchining ma’lum qilishicha, rahbariyat ularning oylik maoshlarini bir yil-u uch oydan buyon noto‘g‘ri hisob-kitob qilib kelgan: “Besh oy ichida buning sababini topdik, deyishdi. Noto‘g‘ri hisoblangan pullarni oyligimizdan to‘lar ekanmiz”.
Bundan tashqari, xodimlar rahbardan ham norozi. “Texnikani tushunmaydi”, deb hisoblaydi. Xo‘sh, UzAuto Motors’da kimlar rahbarlik qilmoqda? “Troll.uz”ga xabar yetkazgan insayderga ko‘ra, “...Sobiq prokuror G‘ofurov Alisher garajga bosh qilib qo‘yildi. Zavod xavfsizligiga prokuror Rajabov Hasan, xaridlar bilan shug‘ullanadigan ham prokuror, moliya bilan shug‘ullanadigan ham prokuror, bularni barchasini direktor o‘rinbosari va sobiq prokuror Obidov Sh. qo‘llab-quvvatlaydi... Prokurorlar zavodni qo‘lga olgan”.
“Troll.uz” muallifi Umid G‘afurov Twitter orqali amerikalik venchur tadbirkor Ilon Maskdan Tesla elektromobillar zavodida nechta prokuror ishlashini so‘radi.
“Daryo”da qoling. Biz o‘quvchibay, muxlisbay va albatta, sifatbay ishlaymiz. Ko‘rishguncha.
Izoh (0)