Ijtimoiy tarmoqlarda 6-mart kuni UzAuto Motors AJga qarashli Transport tashuvlari boshqarmasining haydovchi xodimlari ish haqi va rahbariyatidan norozi bo‘lib, avtoturargoh oldida to‘plangani aks etgan video tarqaldi.

Kadr: Telegram

Videodan ko‘rish mumkinki, UzAuto Motors tomonidan ishlab chiqarilgan avtomobillarni respublikaning turli hududlariga tashuvchi yuk mashina haydovchilari maoshlari keskin tushib ketganidan norozi.

“Bir oylik ish haqim 20 ming so‘m chiqibdi, ba’zilarga 450 so‘m ish haqi to‘langan. Avval ham shunaqa qilishgan edi. Haydovchilar oyligidan 800 ming so‘mdan ushlab qolingan. Bizni haqorat qilishmoqda. Kechasi bilan uxlamay ishlaganmiz, kerak bo‘lsa, kechasi bilan uxlatmay ishlatishyapti. Xorazmgacha mashina tashiganman.”, – deydi xodimlardan biri.

Yana bir haydovchining ma’lum qilishicha, rahbariyat ularning oylik maoshlarini bir yil-u uch oydan buyon noto‘g‘ri hisob-kitob qilib kelgan: “Besh oy ichida buning sababini topdik, deyishdi. Noto‘g‘ri hisoblangan pullarni oyligimizdan to‘lar ekanmiz”.

Uning qo‘shimcha qilishicha, haydovchilar 2018-yilgacha yaxshi ishlagan. Lekin shundan keyin Toshkent shahridan rahbarlar kelgach parokandalik va tushunmovchiliklar boshlangan. Norozi haydovchilar rahbarlarini ham ishdan olishni talab qilishgan.

“Alisher G‘ofurov rahbarlikka umuman noloyiq. Biz rahbarni almashtirib berishini talab qilamiz. Texnikani umuman tushunmaydi. Bir masala bilan oldiga kirsangiz, 5 daqiqadan keyin aytgan gapingiz yodidan chiqib qoladi”, – dedi haydovchilardan biri.

Ta’kidlanishicha, 5 oy avval oyliklarning ikki baravar qisqargani ustidan kasaba uyushmalari Federatsiyasiga murojaat qilingan. Lekin hech qanday javob berilmagan. Faqat rahbariyat tomonidan og‘zaki javob berilgan. Haydovchilardan birining so‘zlariga ko‘ra, bunga sabab qilib auditorlik tekshiruvi ketayotgani vaj qilib ko‘rsatilgan.

UzAutoMotors kompaniyasining ma’lum qilishicha, transport tashuvlari boshqarmasi haydovchilari D.Rahmonov, J.Sultonov va boshqalarning oylik ish haqi to‘lanishi hamda ushlanmalardan norozi bo‘lib qilgan videomurojaati o‘rganilgan.

Aniqlanishicha, UzAutoMotors AJ kompaniyasida ayni vaqtda ish haqidan qarzdorlik mavjud emas. Joriy yilning fevral oyi uchun ish haqi o‘tgan oyning 20-sanasida avans tariqasida, mart oyining 5-sanasida to‘liq to‘lab berilgan. Xodimning ish haqidan uning yozma arizasiga asosan kredit to‘lovlari hamda sud qaroriga asosan majburiy undiruv amalga oshirilgan.

Ushbu murojaat yuzasidan shu kunning o‘zida kompaniya mas’ul vakillari hamda Andijon viloyati hokimligi, viloyat bandlikka ko‘maklashish boshqarmasi xodimlari ishtirokida haydovchilar bilan ochiq muloqot o‘tkazilib, unda UzAutoMotors AJ tomonidan ish haqini to‘liq hisoblab to‘lab berilganligi, kompaniya tomonidan biror-bir asossiz ushlanmalar amalga oshirilmaganligi, shuningdek, ishchi-xodimlarga yaratilgan ijtimoiy himoya paketi, ya’ni transportda ishga kelib-ketishi, maxsus kiyim-bosh bilan ta’minlanishi, ovqatlanishi, tibbiy ko‘riklari uchun to‘lovlar kompaniya hisobidan amalga oshirilayotganligi tushuntirib berilgan.

Eslatib o‘tamiz, 21-oktabr kuni Qashqadaryo viloyati G‘uzor tumanida qurilayotgan Uzbekistan GTL zavodida ishchilarning ommaviy tartibsizligi yuz bergan. Qurilish ishlarini amalga oshirayotgan Enter Engineering kompaniyasi tartibsizlik tongda ishchilar uchun mo‘ljallangan oshxonaning monoblok uskunasi (elektron o‘tkazish tizimi)da texnik nosozliklar yuzaga kelgani bois ular o‘z vaqtida nonushtaga kira olmagani sababli yuz berganini ma’lum qildi.

Zavod mas’uli Shuhrat Arziyev OAV vakillari bilan muloqotda Uzbekistan GTL zavodi qurilishidagi ishchilarining ommaviy noroziligiga ularning ish kuni ko‘payib, dam olish kuni o‘zgarishsiz qolgani ham sabab bo‘lganini aytgan. Uzbekistan GTL bosh direktori Faxriddin Abdurasulov to‘polon ko‘targan ishchilar masalasiga to‘xtalib o‘tib, karantin sabab ularning ish kuni ortib, dam olish kuni o‘zgarishsiz qolgani sabab ishchilarda ruhiy toliqish bo‘lganini ma’lum qilgandi.

Keyinroq Uzbekistan GTL zavodini qurayotgan Enter Engineering kompaniyasi Mehnat kodeksining 161-moddasini, ya’ni mehnatga haq to‘lash tartibini qo‘pol ravishda buzgani ma’lum qilindi.