Samarqandda Turkiyaning bosh konsulxonasi ochildi, deb xabar bermoqda viloyat hokimligi matbuot xizmati.
“Gazeta.uz”ning ma’lum qilishicha, 7-mart kuni bo‘lib o‘tgan tantanali ochilish marosimida bosh vaziri o‘rinbosari Aziz Abduhakimov, tashqi ishlari vaziri Abdulaziz Komilov, Turkiya tashqi ishlar vaziri Mavlud Chovusho‘g‘li va Samarqand viloyati hokimi Erkinjon Turdimov va boshqalar ishtirok etdi.
Konsullik Turkiya va O‘zbekiston o‘rtasidagi investitsiya, savdo-iqtisodiy va madaniy-gumanitar hamkorlikni rivojlantirish vazifalarini amalga oshiradi.
Turkiya tashqi ishlar vazirining O‘zbekistonga tashrifi 9-martga qadar davom etadi. Turkiya delegatsiyasi O‘zbekiston va Turkiya tashqi ishlar vazirlari raisligida Strategiyani rejalashtirish guruhining ikkinchi yig‘ilishida ishtirok etadi.
Samarqandda Turkiyaning bosh konsulxonasi ochilishi Vazirlar Mahkamasining 2020-yil 18-avgustidagi qarorida ko‘zda tutilgandi. Hujjat Turkiya hukumatining O‘zbekistonga texnik ko‘magini kengaytirishni nazarda tutadi. Turk ekspertlari sog‘liqni saqlash infratuzilmasi obyektlarini boshqarish sohasidagi salohiyatini oshirish, seysmologiya sohasidagi institutsional va normativ-huquqiy bazani mustahkamlash, yo‘llar va yo‘l bo‘yi infratuzilmasini qurish hamda ulardan samarali foydalanish sohasida xalqaro standartlarni joriy etishga ko‘maklashish, shuningdek, elektron hukumat sohasida Turkiyaning eng yaxshi yechimlari va texnologiyalarini joriy etishga jalb etiladi.
Avvalroq Turkiyaning O‘zbekistondagi yangi elchisi Olgan Bekar ish boshlagani haqida xabar berilgandi.
Turkiya O‘zbekistonda 2020-yilda eng ko‘p kompaniyalar ochgan. Respublika Davlat qo‘mitasi ma’lumotlariga ko‘ra, o‘tgan bir yil ichida mamlakatda 305 ta turk korxonasi o‘z faoliyatini boshladi (jami 1715 xorijiy kompaniya ochildi). Undan keyingi o‘rinlarda Rossiya (265 ta yangi korxona) va Xitoy (147 ta) turibdi.
2020-yil yakunlariga ko‘ra, Turkiya O‘zbekistonning beshinchi yirik savdo sherigiga aylandi — 2,1 milliard dollar (eksport — 1 milliard dollar, import — 1,1 milliard dollar).
Izoh (0)