Slovakiya bosh vaziri “Sputnik V” vaksinasi evaziga Rossiyaga Ukrainaning hududini bermoqchiligini aytib, hazil qildi. Ukraina hazil uchun vazirdan rasmiy uzr so‘rashni talab qildi

Ukraina Tashqi ishlar vazirligi Slovakiya bosh vaziri Igor Matovichdan koronavirusga qarshi “Sputnik V” vaksinasi evaziga Rossiyaga Ukrainaning Zakarpatye viloyatini bermoqchiligi haqida aytgan hazili uchun rasmiy kechirim so‘rashni talab qildi. Bu haqda Meduza xabar berdi.

Matovich 3-mart kuni Radio Express’ga bergan intervyusida boshlovchining vaksina yetkazib berish evaziga Rossiyaga nima va’da qilingani haqidagi savoliga javob berar ekan, to‘lov “Ukrainaning Zakarpatye viloyati” bo‘lishini aytib, hazil qilgan. Keyinchalik u Rossiyaga hech narsa va’da qilmaganini va Rossiya ham hech narsa talab qilmaganini aytgan.

“Motivlari, janri yoki kontekstidan qat’i nazar, Slovakiya hukumati rahbarining Ukrainaning hududiy yaxlitligiga bevosita ta’sir ko‘rsatuvchi bayonotlarini mutlaqo qabul qilib bo‘lmaydi. Bunday bayonotlar Ukraina—Slovakiya munosabatlaridagi do‘stona va yaxshi qo‘shnichilik sifatiga salbiy ta’sir ko‘rsatadi”, — dedi Ukraina TIV bunga javoban.

Ukraina tashqi ishlar vaziri Dmitriy Kuleba Matovichning Twitter’dagi bayonotiga izoh qoldirar ekan, unga Rossiya vaksinasini Slovakiyaning bir nechta hududlariga almashtirishni taklif qildi.

https://twitter.com/DmytroKuleba/status/1367138955347578881

Slovakiya tashqi ishlar vaziri Ivan Korchok ukrainalik hamkasbidan Matovichning “noo‘rin so‘zlari” uchun uzr so‘radi.

“RBK” agentligining xabar berishicha, Rossiya prezident matbuot kotibi Dmitriy Peskov “Sputnik V” vaksinasining Slovakiyaga yetkazib berilishi insonparvarlik yordami emasligini aytgan. Peskov jurnalistlarning Moskva vaksina yetkazib berish evaziga Bratislavadan biron nima so‘raganmi yoki yo‘qligi haqidagi savoliga shunday javob bergan.

“Barcha vaksinalarning o‘z narxi bor. Aytgancha, rus vaksinasining narxi boshqalarnikidan arzonroq”, — deydi Peskov. Uning ta’kidlashicha, Moskva, avvalo, o‘z fuqarolarining ehtiyojlarini va xorijiy davlatlardan tushayotgan ko‘plab talablarni qondirish uchun barcha imkoniyatlarni ishga solmoqda.

Ma’lumot uchun, Slovakiya Yevropa Ittifoqidagi Rossiyaning “Sputnik V” vaksinasidan foydalanishni ma’qullagan ikkinchi davlatdir. Amaldagi rejaga ko‘ra, mamlakatga 2 million dozada dori yetkazib beriladi. Slovakiya 2021-yil may—iyun oylaridayoq 1 million dozani olishi kutilmoqda.

Avvalroq Slovakiyada 3-martdan komendantlik soati joriy etilishi va aholiga respirator taqish majburiyati yuklanishi haqida xabar berilgandi.