AQShning sobiq prezidenti Donald Tramp ma’muriyati davrida Davlat departamentini boshqargan Maykl Pompeo 2024-yilgi saylovlarda davlat rahbari lavozimiga o‘z nomzodini qo‘yishi mumkin. Bu haqda u Fox News telekanalida ma’lum qildi, deb yozmoqda “TASS”.
Teleboshlovchi sobiq davlat kotibidan agar Tramp nomzodini qo‘ymaslikka qaror qilsa, uning kelgusi saylovlarda prezidentlik poygasiga kirishga tayyor yoki yo‘qligini so‘radi. “Men har doim jang qilishga tayyorman. Men Amerika uchun nihoyatda xavotirdaman”, — deb javob berdi Pompeo. Shuningdek u uzoq vaqtdan beri konservativ harakatlarning bir qismi bo‘lib kelayotganini ta’kidladi. “Xuddi shu qarashlarga rioya qilishda davom etishni rejalashtirmoqdaman”, — dedi u.
2021-yil 28 fevral kuni Tramp Florida shtatidagi Orlando shahrida AQSh konservativ doiralari konferensiyasida nutq so‘zlar ekan, o‘zining yana prezidentlik uchun kurashda qatnashishi mumkinligini tan oldi. Bloomberg agentligi xabariga ko‘ra, sobiq prezident agar prezidentlik poygasida qatnashsa, uning ma’muriyatida vitse-prezident bo‘lib ishlagan Mayk Pensni o‘z saylovoldi kampaniyasiga jalb qilishni rejalashtirmayapti. Shu bilan birga, Trampning maslahatchisi Jeyson Miller agentlik muxbirlariga bergan bayonotida Trampning 2024-yilgi prezidentlik saylovlariga nomzodini qo‘yishi to‘g‘risida hali yakuniy qaror qabul qilmaganini aytdi.
Avvalroq AQSh politsiyasiga kelib tushgan ogohlantiruvchi xabarlar va razvedka ma’lumotlari tufayli Vashingtondagi Kapitoliy binosi atrofida xavfsizlik choralari kuchaytirilayotgani haqida xabar berilgandi. Washington Post gazetasining ta’kidlashicha, o‘ng qanot radikallari 4-martni “haqiqiy inauguratsiya kuni” deb atab, o‘sha kuni AQShning sobiq prezidenti Donald Tramp ikkinchi prezidentlik muddati uchun qasamyod keltiradi, degan uydirmalarni tarqatmoqda. AQSh Kongressi Vakillar palatasi xavfsizlik xizmatining Kapitoliyga hujum uyushtirilish xavfi haqidagi ogohlantirishlari sababli 4-mart kuni o‘tkaziladigan majlisni bekor qildi.
Izoh (0)