Germaniyada karantin rejimi mart oyining oxirigacha uzaytiriladi, ammo rasmiylar epidemiologik vaziyat imkon bersa, cheklovlarni ertaroq yumshatishga kelishib oldi. Bu haqda Germaniya kansleri Angela Merkel ma’lum qildi, deb yozmoqda “RBK”.
Umumiy karantin rejimi 28-martga qadar uzaytiriladi, ammo cheklovlarni yumshatish 8-martdan boshlanishi mumkin. Xususan, har 100 ming aholiga 50 tadan kamroq kasallanish holati to‘g‘ri keladigan hududlarda kitob va gul do‘konlari, shuningdek, bog‘dorchilik bozorlari ochiladi. Bundan tashqari, hukumat muzey, galereya, botanika bog‘lari va hayvonot bog‘larini oldindan buyurtma qilingan yakka tashriflar uchun ochishi hamda do‘konlarga imtiyozlar joriy qilishi mumkin.
Ikki haftadan keyin kasallanish holati kamaysa, cheklovlarni yumshatishning yangi bosqichiga o‘tilishi mumkin, jumladan, koronavirusga test salbiy chiqqan kishilarga teatr, konsert va opera zallariga, kinoteatrlarga tashrif buyurishi uchun ruxsat beriladi.
So‘ng yana 14 kun o‘tgach, 5-apreldan keyin testning salbiy natijasi talab qilinmasdan ham yopiq maydon va ochiq havodagi har qanday sport turi bilan shug‘ullanishga ruxsat berilishi mumkin.
Cheklovlarni bekor qilish to‘g‘risida qarorlarni har bir hududning o‘zi qabul qiladi, dedi kansler. Germaniya vitse-kansleri Olaf Sholz esa koronavirusga qarshi emlanganlar uchun cheklovlarni bekor qilish kerakligini aytdi. “Tadqiqotlar shuni ko‘rsatmoqdaki, emlanganlar endi virusli kasalliklarni yuqtirmaydi, shuning uchun ularda kasallanish xavfi bo‘lmaydi, biz ushbu guruh uchun qanday turdagi cheklovlarni bekor qilish mumkinligini muhokama qilishimiz kerak”, — dedi Sholz. U vaksina qabul qilganlarga COVID-19 testining salbiy natijasi talab qilinadigan barcha joylarga kirishga ruxsat berishni taklif qildi.
Germaniyada lokdaun 2020-yilning dekabr oyida joriy qilingan edi. Barcha muassasalar yopilib, faqat oziq-ovqat va kichik jihozlar do‘koni, dorixona, bank, pochta aloqasi bo‘limlari, tibbiy klinika va boshqa bir qator tashkilotlar o‘z faoliyatini davom ettirgan.
Maktablar masofaviy ta’lim shakliga o‘tkazilgan va bolalar bog‘chasini masofaviy ta’limga o‘tkazish bo‘yicha esa har bir hududning o‘zi qaror qabul qilgan.
Lokdaun muddati bir necha bor uzaytirilgan, oxirgi marta 10-fevral kuni cheklovlar 7-martga qadar uzaytirilishi ma’lum qilingan. Deutsche Welle nashri xabariga ko‘ra, ba’zi federal shtatlar karantin muddatini uzaytirishga qarshi chiqqan, ammo kansler bu qarorni “ bosim bilan ilgari surgan”.
Jons Hopkins universiteti ma’lumotlariga ko‘ra, pandemiya boshidan beri Germaniyada 2,4 million kishi koronavirusga chalingan, 71,2 ming kishi kasallikdan vafot etgan.
Izoh (0)