Germaniya kansleri Angela Merkel Germaniyaning Wirecard elektron to‘lovlar operatorining firibgarligi yuzasidan tekshiruv bo‘yicha Bundestag qo‘mitasi oldida guvohlik beradi. Bu haqda Bild nashri va DPA agentligi o‘z manbalariga asoslanib xabar berdi. Shuningdek, ushbu ma’lumotni qo‘mita a’zosi Florian Tonkar tasdiqladi, deb yozadi Meduza.
Xabarga ko‘ra, Bundestag qo‘mitasi zimmasiga Germaniya hukumatining Wirecard mojarosi bilan bog‘liq qanday xatolarga yo‘l qo‘yganligini aniqlash vazifasi yuklatilgan.
Merkel 23-aprel kuni qo‘mita a’zolari oldida so‘zga chiqadi. Qo‘mitaga guvoh sifatida vitse-kansler va moliya vaziri Olaf Sholz, shuningdek, iqtisodiyot vaziri Peter Altmayer taklif qilingan. 20-aprel kuni Altmayerning, 22-aprel kuni esa Sholzning guvohlik chiqishi bo‘lib o‘tadi.
Merkelga 2019-yil sentabr oyida Xitoyga rasmiy tashrifi chog‘ida nima uchun u Wirecard manfaatlarini ilgari surgani to‘g‘risida savollar berilishi kutilmoqda, chunki o‘sha paytga qadar OAV allaqachon Wirecard firibgarligi haqida yozgan, Singapurda esa kompaniyaning faoliyati bo‘yicha tergov olib borilayotgan edi.
Ma’lumot uchun, Germaniyaning Wirecard kompaniyasi o‘z faoliyatini 1999-yilda boshlagan. U bank va yirik to‘lov tizimlari hamkorlikdan bosh tortgan mijozlar, masalan, pornografik saytlar va noqonuniy kazinolarga to‘lovlarni amalga oshirish masalalarida xizmat ko‘rsatgan. 2018-yilga kelib Wirecard Germaniyaning eng taniqli startaplaridan biriga aylandi va mamlakatdagi o‘ttizta eng yirik kompaniyalar qatoriga kirdi.
2020-yil iyun oyida auditorlar Wirecard hisobvaraqlarida 2 milliard yevro kamomadni aniqladi. Kompaniyaning bosh direktori Markus Braun hibsga olingan va yuqori rahbariyat ishdan bo‘shatilgan. Firibgarlikning asosiy gumonlanuvchisi hisoblangan Wirecard bosh operatsion direktori avstriyalik Yan Marsalek g‘oyib bo‘lgan. Germaniya va Avstriya hukumati uni qidirmoqda.
The Insider, Bellingcat va Der Spiegel tomonidan olib borilgan tekshiruvlar natijalari shuni ko‘rsatdiki, Marsalek 10 yil ichida Rossiyaga 60 martadan ko‘proq tashrif buyurgan va Rossiya maxsus xizmatlari bilan hamkorlik qilgan bo‘lishi mumkin. Germaniyaning Handelsblatt nashri Marsalek Rossiyada yashiringani, u yerga Belarus orqali o‘tib ketgani haqida xabar bergan.
Izoh (0)