Suriyadagi zarbalardan keyin AQShda senatorlar Jo Baydenga harbiy kuch qo‘llashni taqiqlamoqchi

AQShning Suriyaga uyushtirgan hujumidan keyin Demokratlar va Respublikachilar partiyalaridan senatorlar Tim Keyn va Todd Yang prezidentning harbiy kuch ishlatishdagi vakolatlarini cheklash to‘g‘risidagi qonun loyihasini taqdim etdi. Ilgari senatorlar Prezident Donald Tramp davrida ham xuddi shunday qonun loyihasini ilgari surgan, ammo davlat rahbarining vetosidan o‘tolmagan, deb yozadi “Kommersant”.

“O‘tgan hafta Suriyaga uyushtirilgan havo hujumlari shuni ko‘rsatadiki, partiyasidan qat’i nazar, ijro etuvchi hokimiyat harbiy vakolatlarini kengaytirishda davom etaveradi. Kongress nafaqat yangi harbiy operatsiyalarga ovoz berish, balki endi keraksiz bo‘lgan harbiy operatsiyalar uchun qabul qilingan avvalgi qarorlarni qayta ko‘rib chiqish uchun ham javobgardir”, — dedi demokrat Tim Keyn o‘z bayonotida.

Ushbu qonun loyihasi “Iroqqa qarshi urush uchun asos bo‘luvchi” 1991 va 2002-yilgi qarorlarni cheklaydi. Senatorning so‘zlariga ko‘ra, ushbu qarorlar AQShni “urush yoqasida” ushlab turibdi va Iroqning suverenitetiga putur yetkazmoqda. Keynning ta’kidlashicha, mazkur qarorlarning bekor qilinishi Fors ko‘rfazi va Iroqdagi urushlarga yakun yasaydi.

2020-yilda AQSh Kongressi o‘sha paytdagi prezident Donald Trampning harbiy harakatlar uyushtirish imkoniyatini cheklovchi qonun loyihasini ma’qullagan edi. O‘shanda masala Bag‘dod aeroportining o‘qqa tutilishi va hujum oqibatida Islom inqilobi muhofizlari korpusi (IIMK) “Al-Quds” maxsus bo‘linmasi rahbari general Qosim Sulaymoniyning o‘ldirilishi bilan bog‘liq bo‘lgan edi. Tramp hujjatga veto qo‘ygan va Senat uni yengib o‘tolmagan.

Jo Bayden tomonidan ma’qullangan qarorga ko‘ra esa, 2021-yil 26-fevralga o‘tar kechasi AQSh Suriyada Damashqni qo‘llab-quvvatlovchi eronparast ko‘ngillilar qo‘shini bilan bog‘liq binoga aviazarba bergan. Ma’lumotlarga ko‘ra, zarba mudofaa xususiyatiga ega bo‘lgan va fevral oyida ko‘ngillilar qo‘shini tomonidan Amerika harbiylariga uyushtirilgan uchta hujumga javob bo‘lgan.

Shundan keyin Eron AQShning Yaqin Sharqdagi harakatlari mintaqadagi zo‘ravonlikni kuchaytirishi mumkinligidan xavotir bildirdi. AQShning Suriyadagi Eronga aloqador obyektlarga havo zarbasini berishi mintaqadagi zo‘ravonliklarni yanada kuchaytirib yuborishi mumkin, dedi Eron prezident apparati huzuridagi Strategik tadqiqotlar markazi xalqaro loyihasining direktori Diako Husayniy.