Словакия бош вазири «Спутник V» вакцинаси эвазига Россияга Украинанинг ҳудудини бермоқчилигини айтиб, ҳазил қилди. Украина ҳазил учун вазирдан расмий узр сўрашни талаб қилди

Украина Ташқи ишлар вазирлиги Словакия бош вазири Игор Матовичдан коронавирусга қарши «Спутник V» вакцинаси эвазига Россияга Украинанинг Закарпатье вилоятини бермоқчилиги ҳақида айтган ҳазили учун расмий кечирим сўрашни талаб қилди. Бу ҳақда Meduza хабар берди.

Матович 3 март куни Radio Express’га берган интервьюсида бошловчининг вакцина етказиб бериш эвазига Россияга нима ваъда қилингани ҳақидаги саволига жавоб берар экан, тўлов «Украинанинг Закарпатье вилояти» бўлишини айтиб, ҳазил қилган. Кейинчалик у Россияга ҳеч нарса ваъда қилмаганини ва Россия ҳам ҳеч нарса талаб қилмаганини айтган.

«Мотивлари, жанри ёки контекстидан қатъи назар, Словакия ҳукумати раҳбарининг Украинанинг ҳудудий яхлитлигига бевосита таъсир кўрсатувчи баёнотларини мутлақо қабул қилиб бўлмайди. Бундай баёнотлар Украина—Словакия муносабатларидаги дўстона ва яхши қўшничилик сифатига салбий таъсир кўрсатади», — деди Украина ТИВ бунга жавобан.

Украина ташқи ишлар вазири Дмитрий Кулеба Матовичнинг Twitter’даги баёнотига изоҳ қолдирар экан, унга Россия вакцинасини Словакиянинг бир нечта ҳудудларига алмаштиришни таклиф қилди.

https://twitter.com/DmytroKuleba/status/1367138955347578881

Словакия ташқи ишлар вазири Иван Корчок украиналик ҳамкасбидан Матовичнинг «ноўрин сўзлари» учун узр сўради.

«РБК» агентлигининг хабар беришича, Россия президент матбуот котиби Дмитрий Песков «Спутник V» вакцинасининг Словакияга етказиб берилиши инсонпарварлик ёрдами эмаслигини айтган. Песков журналистларнинг Москва вакцина етказиб бериш эвазига Братиславадан бирон нима сўраганми ёки йўқлиги ҳақидаги саволига шундай жавоб берган.

«Барча вакциналарнинг ўз нархи бор. Айтганча, рус вакцинасининг нархи бошқаларникидан арзонроқ», — дейди Песков. Унинг таъкидлашича, Москва, аввало, ўз фуқароларининг эҳтиёжларини ва хорижий давлатлардан тушаётган кўплаб талабларни қондириш учун барча имкониятларни ишга солмоқда.

Маълумот учун, Словакия Европа Иттифоқидаги Россиянинг «Спутник V» вакцинасидан фойдаланишни маъқуллаган иккинчи давлатдир. Амалдаги режага кўра, мамлакатга 2 миллион дозада дори етказиб берилади. Словакия 2021 йил май—июнь ойларидаёқ 1 миллион дозани олиши кутилмоқда.

Аввалроқ Словакияда 3 мартдан комендантлик соати жорий этилиши ва аҳолига респиратор тақиш мажбурияти юкланиши ҳақида хабар берилганди.