Qozog‘iston prezidenti Qosim-Jo‘mart To‘qayev va Qirg‘iziston prezidenti Sadir Japarov qo‘shma bayonot imzoladi. Bu haqda Oq O‘rda saytiga tayanib, Tengrinews xabar berdi.
Qosim-Jo‘mart To‘qayevning taklifiga binoan, 2021-yil 2—3-mart kunlari Qirg‘iziston Respublikasi prezidenti Sadir Japarovning Qozog‘istonga davlat tashrifi bo‘lib o‘tdi.
Xabarga ko‘ra, do‘stona va ishonchli muhitda o‘tgan muzokaralar davomida davlatlar rahbarlari strategik sheriklik va ittifoqchilikni yanada mustahkamlash istiqbollarini batafsil muhokama qildi, shuningdek, mintaqaviy va xalqaro kun tartibining dolzarb masalalari bo‘yicha fikr almashdi.
Prezidentlar Qozog‘iston Respublikasining birinchi prezidenti — Nursulton Nazarboyevning Qozog‘iston va Qirg‘iziston o‘rtasidagi birodarlik va yaxshi qo‘shnichilik munosabatlarini rivojlantirish va mustahkamlashdagi tarixiy rolini, shuningdek, uning Markaziy Osiyoda mintaqaviy hamkorlikni rivojlantirishga qo‘shgan ulkan hissasini alohida ta’kidladi.
Keyin davlat rahbarlari Qozog‘iston va Qirg‘iziston davlatlari o‘rtasidagi abadiy do‘stlik va ittifoqchilik munosabatlari to‘g‘risida qo‘shma bayonotni imzoladi.
Uchrashuv so‘ngida Sadir Japarov Qosim-Jo‘mart To‘qayevga va butun qozoq xalqiga ko‘rsatilgan mehmondo‘stlik uchun minnatdorlik bildirdi va har tomonlama hamkorlikni yanada rivojlantirish maqsadida Qozog‘iston prezidentiga o‘zi uchun qulay vaqtda Qirg‘izistonga tashrif buyurishni taklif qildi. Qosim-Jo‘mart To‘qayev taklifni minnatdorlik bilan qabul qildi. Tashrif sanalari diplomatik kanallar orqali muvofiqlashtiriladi.
Ma’lumot uchun Qirg‘iziston prezidenti Sadir Japarov davlat tashrifi bilan Nur-Sultonga keldi. Shuningdek, Sadir Japarovning Qozog‘iston birinchi prezidenti Nursulton Nazarboyev, Oliy Majlis raisi Nurlan Nigmatulin va bosh vazir Asqar Mamin bilan uchrashuvi kutilmoqda.
Avvalroq Qirg‘iziston prezidenti Sadir Japarov rasmiy tashrif bilan O‘zbekistonga kelishi haqida xabar berilgandi. Tashrif qachon bo‘lib o‘tishiga aniqlik kiritilmagan.
Izoh (0)