Rossiya Prezidenti Vladimir Putin Sovet ittifoqining birinchi va yagona prezidenti, Ijtimoiy-iqtisodiy va siyosiy tadqiqotlar xalqaro jamoat fondi prezidenti Mixail Gorbachyovni 90 yoshi bilan tabrikladi. Tabrik telegrammasi Kreml matbuot xizmati tomonidan e’lon qilindi, deb yozmoqda “RBK”.
Putin Gorbachyovni tengi yo‘q shaxs hamda mamlakat va dunyo tarixining rivojlanishiga katta ta’sir ko‘rsatgan taniqli siyosiy arbob deb atadi.
“Sizdagi katta kasbiy va hayotiy tajriba, energiya va ijodiy salohiyat bugungi kunda ommaviy ijtimoiy va ma’rifiy ishlarda faol ishtirok etishingizda, xalqaro gumanitar loyihalarni amalga oshirishga e’tibor berishingizda nihoyatda qo‘l kelmoqda”, — deyiladi telegrammada.
Bosh vazir Mixail Mishustin ham Gorbachyovni tug‘ilgan kuni bilan tabrikladi. Hukumat rahbarining ta’kidlashicha, SSSR sobiq prezidentining nomi butun dunyo bo‘ylab “global o‘zgarishlar timsoli”ga aylangan.
Gorbachyovning do‘sti, “Moskva sadosi” radiostansiyasining bosh muharriri Aleksey Venediktov shuningdek, Buyuk Britaniya bosh vaziri Boris Jonsonning tabrigini Telegram’ga joylashtirdi.
Gorbachyov 1931-yilda Stavropol o‘lkasida tug‘ilgan. 1955-yilda yuridik fakultetini tugatgach, u o‘z mutaxassisligi bo‘yicha atigi o‘n kun ishlagan. Shundan so‘ng u Butunittifoq Leninchi kommunistik yoshlar soyuzi Stavropol o‘lkasi qo‘mitasi targ‘ibot va tashviqot bo‘limi mudiri o‘rinbosari, 1961-yildan viloyat qo‘mitasining birinchi kotibi bo‘lib ishlagan.
1966-yilda uning nomzodi KGB (Davlat xavfsizlik qo‘mitasi) Stavropol bo‘limi boshlig‘i lavozimi uchun ko‘rib chiqildi. 1970-yildan boshlab u Sovet Ittifoqi Kommunistik partiyasi (KPSS) o‘lka qo‘mitasining birinchi kotibi bo‘lib ishlagan.
1971-yildan u KPSS markaziy qo‘mitasi a’zosi bo‘lgan. Turli xil taxminlarga ko‘ra, uning Moskvaga o‘tishi va partiya safida ko‘tarilishiga Yuriy Andropov, Mixail Suslov, Andrey Gromiko hissa qo‘shgan. 1980—1991-yillarda Gorbachyov KPSS markaziy qo‘mitasi siyosiy byurosining a’zosiga aylangan.
1985-yildan KPSS markaziy qo‘mitasining bosh kotibi, 1988-yildan SSSR Oliy Kengashi prezidiumining raisi lavozimlarida faoliyat yuritgan. 1990-yil mart oyida u xalq deputatlari navbatdan tashqari syezdida SSSR prezidenti etib saylangan.
Gorbachyov davlat rahbari sifatida qayta qurishni boshlagan, bu esa kelajakda bozor iqtisodiyoti va erkin saylovlar institutining shakllanishiga, KPSS hokimiyat monopoliyasining buzilishiga va SSSRning qulashiga olib kelgan. Uning hukmronligi davridagi muhim bosqichlar qatoridan alkogolga qarshi kurashda muvaffaqiyatsizlikka uchragan kampaniya, tadbirkorlikni qonuniylashtirish, korxonalarni o‘zini o‘zi moliyalashtirishga o‘tkazish, hukumat va kadrlar islohoti, oshkoralikni joriy etish va partiyalar senzurasini olib tashlash singari harakatlar o‘rin olgan.
1991-yil 8-dekabrda Gorbachyov davrida SSSR davlatini amalda bekor qilinishini ko‘rsatadigan Belovejskaya shartnomalari imzolandi. Keyingi ikki hafta ichida Gorbachyov rahbarligida Mustaqil Davlatlar Hamdo‘stligi (MDH) tuzildi. 25-dekabr kuni esa Gorbachyov iste’foga chiqishini e’lon qildi.
Izoh (0)