Қозоғистон президенти Қосим-Жўмарт Тўқаев ва Қирғизистон президенти Садир Жапаров қўшма баёнот имзолади. Бу ҳақда Оқ Ўрда сайтига таяниб, Tengrinews хабар берди.
Қосим-Жўмарт Тўқаевнинг таклифига биноан, 2021 йил 2—3 март кунлари Қирғизистон Республикаси президенти Садир Жапаровнинг Қозоғистонга давлат ташрифи бўлиб ўтди.
Хабарга кўра, дўстона ва ишончли муҳитда ўтган музокаралар давомида давлатлар раҳбарлари стратегик шериклик ва иттифоқчиликни янада мустаҳкамлаш истиқболларини батафсил муҳокама қилди, шунингдек, минтақавий ва халқаро кун тартибининг долзарб масалалари бўйича фикр алмашди.
Президентлар Қозоғистон Республикасининг биринчи президенти — Нурсултон Назарбоевнинг Қозоғистон ва Қирғизистон ўртасидаги биродарлик ва яхши қўшничилик муносабатларини ривожлантириш ва мустаҳкамлашдаги тарихий ролини, шунингдек, унинг Марказий Осиёда минтақавий ҳамкорликни ривожлантиришга қўшган улкан ҳиссасини алоҳида таъкидлади.
Кейин давлат раҳбарлари Қозоғистон ва Қирғизистон давлатлари ўртасидаги абадий дўстлик ва иттифоқчилик муносабатлари тўғрисида қўшма баёнотни имзолади.
Учрашув сўнгида Садир Жапаров Қосим-Жўмарт Тўқаевга ва бутун қозоқ халқига кўрсатилган меҳмондўстлик учун миннатдорлик билдирди ва ҳар томонлама ҳамкорликни янада ривожлантириш мақсадида Қозоғистон президентига ўзи учун қулай вақтда Қирғизистонга ташриф буюришни таклиф қилди. Қосим-Жўмарт Тўқаев таклифни миннатдорлик билан қабул қилди. Ташриф саналари дипломатик каналлар орқали мувофиқлаштирилади.
Маълумот учун Қирғизистон президенти Садир Жапаров давлат ташрифи билан Нур-Султонга келди. Шунингдек, Садир Жапаровнинг Қозоғистон биринчи президенти Нурсултон Назарбоев, Олий Мажлис раиси Нурлан Нигматулин ва бош вазир Асқар Мамин билан учрашуви кутилмоқда.
Аввалроқ Қирғизистон президенти Садир Жапаров расмий ташриф билан Ўзбекистонга келиши ҳақида хабар берилганди. Ташриф қачон бўлиб ўтишига аниқлик киритилмаган.
Изоҳ (0)